SURAT NEWS: ગુજરાતનું આર્થિક પાટનગર અને ડાયમંડ સિટી ગણાતું સુરત શહેર ફરી એકવાર હૃદયદ્રાવક અને ચકચારી હત્યાની ઘટનાથી ધ્રુજી ઊઠ્યું છે. શહેરના પુણા વિસ્તારમાં એક પાપી પતિએ પવિત્ર ગણાતા લગ્નજીવનના સંબંધોને લજવીને પોતાની જ પત્ની પર અમાનુષી અત્યાચાર ગુજાર્યા બાદ તેની ઘાતકી હત્યા કરી નાખી છે. ક્રૂરતાની તમામ હદો પાર કરનાર આ પતિ પત્નીને ઘરમાં બંધક બનાવીને રોજ પશુની જેમ ઝૂડતો હોવાનો ચોંકાવનારો ખુલાસો થયો છે. આ મામલે સુરતની પુણા પોલીસે ત્વરિત અને કડક કાર્યવાહી કરીને ગણતરીના કલાકોમાં જ હત્યારા પતિની ધરપકડ કરી કાયદાના સિકંજામાં લીધો છે.
પોલીસના સત્તાવાર સૂત્રો અને તપાસ દરમિયાન સામે આવેલી વિગતો અનુસાર, પુણા વિસ્તારમાં રહેતા અભિમાનચંદ્ર પટેલ નામના શખ્સે અગાઉ રેણુ નામની યુવતીને ડરાવી-ધમકાવીને તેની સાથે જબરદસ્તીથી લગ્ન કર્યા હતા. લગ્ન બાદ તે રેણુને ઉત્તર પ્રદેશથી સુરત લઈ આવ્યો હતો. જો કે, સુરત આવ્યા બાદ અભિમાનચંદ્રનો અસલી અને રાક્ષસી ચહેરો સામે આવ્યો હતો.
તેણે પત્ની રેણુનું ઘરની બહાર નીકળવાનું અને લોકો સાથે મળવાનું સંપૂર્ણ બંધ કરાવી દીધું હતું. આરોપી અભિમાનચંદ્ર રેણુને ચોવીસ કલાક એક રૂમમાં પૂરી રાખતો હતો અને સામાન્ય બાબતોમાં પણ તેના પર લાકડીઓ તથા લોખંડની વસ્તુઓથી પાશવી હુમલો કરતો હતો. પત્ની મદદ માટે બૂમો ન પાડે તે માટે તેને રૂમમાં પૂરીને જ ઢોર માર મારવામાં આવતો હતો. આ જીવલેણ હુમલા અને ગંભીર ઈજાઓના કારણે માસૂમ રેણુએ રૂમની અંદર જ દમ તોડી દીધો હતો.
ઘટનાની જાણ થતાં જ પુણા પોલીસ સ્ટેશનનો ઉચ્ચ અધિકારીઓ સહિતનો કાફલો ઘટનાસ્થળે દોડી આવ્યો હતો. જ્યારે પોલીસે મૃતદેહનો કબજો મેળવી તપાસ કરી, ત્યારે ત્યાં હાજર તમામ લોકોના કાળજા કંપી ગયા હતા. મૃતક રેણુના આખા શરીરે લાકડીઓ અને પટ્ટા મારવાના કારણે કાળા અને લાલ કલરના સોળ (ચકામા) ઉપસી આવ્યા હતા.
આ મામલાની ગંભીરતાને ધ્યાનમાં રાખીને સુરત પોલીસ કમિશનરની સૂચનાથી પુણા પોલીસ સ્ટેશનના પી.આઈ. અને તેમની ટીમે તાત્કાલિક અલગ-અલગ ટીમો બનાવી આરોપીને દબોચી લેવા ચક્રો ગતિમાન કર્યા હતા. ઘટના બાદ ભાગવાની ફિરાકમાં રહેલા આરોપી અભિમાનચંદ્ર પટેલને પોલીસે ટેકનિકલ સર્વેલન્સ અને બાતમીદારોની મદદથી ગણતરીના કલાકોમાં જ પુણા વિસ્તારમાંથી દબોચી લીધો છે.
