SURAT NEWS : ગુજરાતનું આર્થિક પાટનગર અને ‘ડાયમંડ સિટી’ તરીકે ઓળખાતું સુરત શહેર ફરી એકવાર બાળમજૂરીના કાળા કારોબારને કારણે ચર્ચામાં આવ્યું છે. સુરતના પુણા વિસ્તારમાં આવેલી સીતારામ સોસાયટીમાંથી એક હૃદયદ્રાવક અને ચોંકાવનારી ઘટના સામે આવી છે, જેમાં 9 જેટલા માસૂમ સગીર બાળકોને ટેમ્પામાં પશુઓની જેમ ક્રૂરતાપૂર્વક ભરીને ભગાડી જવાનો પ્રયાસ કરવામાં આવી રહ્યો હતો. આ ઘટનાના સીસીટીવી ફૂટેજ સોશિયલ મીડિયા અને મીડિયામાં વાયરલ થયા બાદ, સુરત પોલીસ સફાળી જાગી છે અને આ માનવ તસ્કરીના મોટા રેકેટનો પર્દાફાશ કરવા માટે કાયદેસરની કાર્યવાહી હાથ ધરી છે.
આ સમગ્ર મામલો ત્યારે પ્રકાશમાં આવ્યો જ્યારે સુરતના પુણા પોલીસ મથકની હદમાં આવેલી સીતારામ સોસાયટીના સીસીટીવી ફૂટેજ સામે આવ્યા. આ ફૂટેજમાં સ્પષ્ટપણે જોઈ શકાતું હતું કે, કેટલાક શખ્સો નાના માસૂમ બાળકોને, જેમની ઉંમર માંડ 10 થી 15 વર્ષની વચ્ચે હશે, તેમને એક બંધ બોડીના ટેમ્પામાં ઘેટાં-બકરાંની જેમ પાછળના ભાગે ભરી રહ્યા હતા. બાળકોના ચહેરા પરનો ડર અને લાચારી ફૂટેજમાં સાફ દેખાતી હતી. આ બાળકોને કોઈને ખબર ન પડે તે રીતે ચોરીછૂપીથી ક્યાંક ખસેડવાની પેરવી થઈ રહી હતી.
સીસીટીવી ફૂટેજ એ વાતનો પાકો પુરાવો હતા કે અહીં મોટા પાયે બાળમજૂરી કરાવાઈ રહી છે અને કાયદાના ડરથી બાળકોને છુપાવવાનો પ્રયાસ થઈ રહ્યો છે. પુણા પોલીસના ઉચ્ચ અધિકારીઓના માર્ગદર્શન હેઠળ પોલીસે આ મામલે કડક વલણ અપનાવ્યું છે. તપાસ દરમિયાન સામે આવ્યું છે કે, અત્યાર સુધીમાં માત્ર આ એક જ નેટવર્ક દ્વારા રાજસ્થાનના અંતરિયાળ અને ગરીબ વિસ્તારોમાંથી અંદાજે 95 જેટલા બાળકોને સુરત લાવવામાં આવ્યા છે. ગરીબ પરિવારોની લાચારીનો ફાયદો ઉઠાવી બાળકોને સુરત સપ્લાય કરનારા એજન્ટોના મૂળ સુધી પહોંચવા માટે સુરત પોલીસે અલગ-અલગ ટીમો બનાવી છે.
પોલીસની એક ટીમ રાજસ્થાન રવાના થાય તેવી પણ શક્યતા છે, જેથી ત્યાં સક્રિય સ્થાનિક દલાલોને દબોચી શકાય. આ ઉપરાંત, સુરતના અન્ય કયા-કયા કારખાનાઓમાં આ 95 બાળકોને વહેંચવામાં આવ્યા છે અથવા કામે રાખવામાં આવ્યા છે, તેની કુંડળી પણ પોલીસ શોધી રહી છે. આગામી દિવસોમાં સુરતના અન્ય વિસ્તારોમાં પણ મોટા પાયે સર્ચ ઓપરેશન જોવા મળી શકે છે.
