Rajkot News : રાજકોટ મહાનગરપાલિકામાં વિપક્ષ અને સામાન્ય જનતા દ્વારા અવારનવાર પક્ષપાતી નીતિના આક્ષેપો થતા રહે છે, ત્યારે તાજેતરમાં જ પૂર્વ મેયરના એક વિવાદાસ્પદ બાંધકામનો મામલો જોરશોરથી સામે આવ્યો છે. આ બાંધકામ અગાઉ વિવાદમાં સપડાયું ત્યારે કોર્પોરેશનના તંત્ર દ્વારા તેને અટકાવી દેવામાં આવ્યું હતું. જોકે આશ્ચર્યજનક રીતે આ પ્રતિબંધિત બાંધકામ આજે ફરીથી ધમધમતું થઈ ગયું છે અને તે પૂર્ણ થવાના આરે પહોંચ્યું હોવા છતાં તંત્ર ઊંઘતું રહ્યું છે. આ ગંભીર મુદ્દે જ્યારે રાજકોટ મનપાની સ્ટેન્ડિંગ કમિટીના ચેરમેન પરેશ પીપળીયાને સવાલો પૂછવામાં આવ્યા ત્યારે તેમણે લૂલો બચાવ કરતા જણાવ્યું હતું કે, મીડિયાના માધ્યમથી જ આ વિષય પહેલીવાર તેમના ધ્યાનમાં આવ્યો છે અને આ પહેલાં તેમને આ અંગે કોઈ ચોક્કસ માહિતી ન હતી. જે તે સમયે આ બાંધકામ સત્તાવાર રીતે અટકાવી દેવાયું હતું, પરંતુ હવે તે કઈ રીતે ફરી શરૂ થયું તે અંગે તેઓ ટાઉન પ્લાનિંગ (TP) શાખામાંથી સઘન તપાસ કરાવશે.
હિંગળાજનગરમાં ગરીબો પર ત્રાટકતું તંત્ર પૂર્વ મેયર સામે નતમસ્તક કેમ?
આ સમગ્ર મામલામાં તંત્રની બેધારી નીતિ ત્યારે છતી થઈ જ્યારે તેની સરખામણી હિંગળાજનગરના કિસ્સા સાથે કરવામાં આવી. સ્થાનિક તંત્ર દ્વારા ચોમાસાની ઋતુનું બહાનું ધરીને હિંગળાજનગરના સામાન્ય અને ગરીબ વસાહતીઓને માત્ર 20 દિવસમાં જગ્યા ખાલી કરી દેવાની કડક નોટિસ ફટકારવામાં આવી હતી. એક તરફ સામાન્ય જનતાને ઘરવિહોણી કરવાની ઉતાવળ અને બીજી તરફ રાજકીય વગ ધરાવતા પૂર્વ મેયરના ગેરકાયદેસર બાંધકામ સામે આંખ આડા કાન કરવાની નીતિ સામે સવાલો ઉઠ્યા છે. શું રાજકીય વગ અને સત્તા ધરાવતા લોકો માટે કાયદાના નિયમો અલગ હોય છે? તેવા વેધક સવાલના જવાબમાં પરેશ પીપળીયાએ બચાવ કરતા કહ્યું કે એવું બિલકુલ નથી. તેમણે ઉમેર્યું કે હિંગળાજનગરના કેસની પણ વિગતો મંગાવવામાં આવી છે અને હાલ પૂરતી એ કાર્યવાહી પણ સ્થગિત રાખવાની સૂચના અપાઈ છે. પૂર્વ મેયરના બાંધકામની વિગતો ટીપી શાખા પાસેથી મેળવ્યા બાદ જ આગળની સ્થિતિ સ્પષ્ટ થશે.
નાના માણસોને તુરંત નોટિસ આપતી ટીપી શાખા મોટા માથાઓ સામે લાચાર
સામાન્ય રીતે જ્યારે કોર્પોરેશનના અધિકારીઓ ચેકિંગમાં નીકળે છે ત્યારે કોઈ નાના માણસનું સામાન્ય કક્ષાનું દબાણ કે નિયમભંગ દેખાય તો તરત જ તેને જીડીસીઆર અંતર્ગત 260 (બી)ની કડક નોટિસ ફટકારી દેવામાં આવે છે. પરંતુ પૂર્વ મેયરના આટલા મોટા અને વિવાદાસ્પદ બાંધકામ આખરી તબક્કામાં પહોંચી ગયું હોવા છતાં હજી સુધી 260 (બી)ની કોઈ નોટિસ કેમ આપવામાં આવી નથી? તેવા તીખા સવાલ સામે સ્ટેન્ડિંગ ચેરમેન નીરુત્તર જેવા જણાયા હતા. તેમણે ગોળગોળ જવાબ આપતા સ્વીકાર્યું કે આ બાબતે ટીપી શાખાએ અત્યાર સુધીમાં શું પગલાં લીધાં છે અને આ આખી ફાઇલ હાલ કયા સ્ટેજે અટકેલી છે, તેની સંપૂર્ણ તપાસ કરાવવામાં આવશે. તપાસના અંતે જે પણ તથ્યો સામે આવશે તે મીડિયા અને જનતા સમક્ષ મૂકવામાં આવશે તેવું આશ્વાસન તેમણે આપ્યું હતું.
સાપ્તાહિક સ્ટેન્ડિંગ બેઠકમાં 17.91 કરોડના વિકાસ કામો મંજૂર, ટેન્કર પ્રક્રિયામાં મોટો ફેરફાર
આ વિવાદોની વચ્ચે રાજકોટ મહાનગરપાલિકાની સ્ટેન્ડિંગ કમિટીની સાપ્તાહિક સમીક્ષા બેઠક યોજાઈ હતી. આ મહત્વની બેઠકમાં કુલ 13 જેટલી વિવિધ દરખાસ્તો રજૂ કરવામાં આવી હતી, જેમાંથી મોટાભાગની દરખાસ્તોને મંજૂરી આપીને અંદાજે 17.91 કરોડ રૂપિયાના વિકાસલક્ષી કાર્યોને લીલી ઝંડી આપવામાં આવી છે. જોકે આ બેઠકમાં રેસકોર્સ ખાતે લાઈટિંગ કરવા માટેની એક દરખાસ્તને નામંજૂર કરવામાં આવી હતી. આ ઉપરાંત, શહેરમાં પાણીના વિતરણને સુવ્યવસ્થિત કરવા માટે પાણીના ટેન્કરના કોન્ટ્રાક્ટ અંગે મોટો નિર્ણય લેવાયો હતો. અગાઉ નક્કી કરાયેલો 2 વર્ષનો પાણીના ટેન્કરનો કોન્ટ્રાક્ટ રદ કરીને હવે માત્ર 1 વર્ષ માટે જ કોન્ટ્રાક્ટ આપવાનું નક્કી કરાયું છે, જેના માટે અંદાજે 5 કરોડ રૂપિયા આસપાસનો જંગી ખર્ચ કરવામાં આવશે તેમ સ્ટેન્ડિંગ કમિટીના ચેરમેન પરેશ પીપળીયાએ બેઠકના અંતે વિગતો આપતા જણાવ્યું હતું.
