RAJKOT NEWS : સૌરાષ્ટ્રની સૌથી મોટી ગણાતી રાજકોટ સિવિલ હોસ્પિટલ ફરી એકવાર વિવાદોના ઘેરામાં આવી છે. હોસ્પિટલના અતિ વ્યસ્ત એવા ઓપીડી વિભાગમાં છેલ્લા કેટલાક સમયથી ઉંદરોનો ભારે ત્રાસ જોવા મળી રહ્યો છે. સારવાર માટે આવતા દર્દીઓ અને તેમના સગા-સંબંધીઓ માટે આ સ્થિતિ જોખમી સાબિત થઈ રહી છે. તાજેતરમાં સોશિયલ મીડિયા પર હોસ્પિટલના વિવિધ વોર્ડ અને ગેલેરીમાં ફરતા ઉંદરોના વીડિયો વાયરલ થતા હોસ્પિટલ તંત્ર હરકતમાં આવ્યું છે.
રાજકોટ સિવિલમાં દરરોજ હજારોની સંખ્યામાં દર્દીઓ સારવાર અર્થે આવે છે. જોકે, છેલ્લા કેટલાક દિવસોથી હોસ્પિટલના ઓપીડી સેક્શનમાં ઉંદરોનો જમાવડો જોવા મળી રહ્યો છે. વાયરલ થયેલા વીડિયોમાં ઉંદરો ખુલ્લેઆમ દોડાદોડી કરતા અને દવાઓ કે મેડિકલ સાધનોની આસપાસ જોવા મળતા હોસ્પિટલની સ્વચ્છતા પર મોટા સવાલો ઉઠ્યા છે. દર્દીઓનો આક્ષેપ છે કે, સારવાર લેવા આવતી વખતે તેમને માંદગીમાંથી મુક્ત થવાની આશા હોય છે, પરંતુ અહીં ઉંદરોના ત્રાસને કારણે અન્ય ચેપી રોગો લાગુ પડવાનો ભય સતાવી રહ્યો છે.
આ મામલે સિવિલ હોસ્પિટલના જવાબદાર અધિકારી ડો. કમલસિંહ ડોડીયાએ સત્તાવાર નિવેદન આપતા જણાવ્યું હતું કે, “સિવિલ હોસ્પિટલ તંત્ર દર્દીઓને શ્રેષ્ઠ સુવિધાઓ અને સ્વચ્છ વાતાવરણ આપવા માટે હંમેશા કટિબદ્ધ છે. ઉંદરોની સમસ્યાના કાયમી ઉકેલ માટે અમે સતત પ્રયત્નશીલ છીએ. ઉંદરોને પકડવા માટે આગામી દિવસોમાં નવી એજન્સીને કોન્ટ્રાક્ટ આપવામાં આવશે, જેથી આ સમસ્યાનું ઝડપથી નિરાકરણ લાવી શકાય.”
ઉલ્લેખનીય છે કે, રાજકોટ સિવિલમાં ઉંદરોની સમસ્યા નવી નથી. ગત વર્ષે પણ ઉંદરોને પકડવા માટે હોસ્પિટલના વિવિધ ભાગોમાં 40 થી વધુ પાંજરા મૂકવામાં આવ્યા હતા. એટલું જ નહીં, ફેબ્રુઆરી 2025 માં પણ ઉંદરોને નિયંત્રિત કરવા માટે ખાસ કોન્ટ્રાક્ટ આપવામાં આવ્યો હતો. આમ છતાં, થોડા સમયના શાંતિ બાદ ફરીથી ઉંદરોનો ઉપદ્રવ વધતા તંત્રની કામગીરી સામે પ્રશ્નાર્થ ચિન્હો ઉભા થયા છે. તંત્ર દ્વારા લાખોનો ખર્ચ કરવામાં આવતો હોવા છતાં ઉંદરોનો આતંક કેમ અટકતો નથી, તે એક ચર્ચાનો વિષય બન્યો છે.
હોસ્પિટલ પ્રશાસન દ્વારા હવે ‘પેસ્ટ કંટ્રોલ’ અને ‘રેટ ટ્રેપિંગ’ માટે વધુ આધુનિક પદ્ધતિઓ અપનાવવાની વિચારણા કરવામાં આવી રહી છે. જે નવો કોન્ટ્રાક્ટ આપવામાં આવશે તેમાં ખાસ શરતો મૂકવામાં આવશે જેથી ઉંદરોનો વંશવેલો વધતો અટકે અને હોસ્પિટલના હાઈજેનિક લેવલમાં સુધારો થાય. ડોક્ટરોએ વધુમાં ઉમેર્યું હતું કે દર્દીઓ સાથે આવતા સગાઓ દ્વારા ફેલાવવામાં આવતા એઠવાડને કારણે પણ ઉંદરો આકર્ષાય છે, જેના માટે લોકોને પણ જાગૃત કરવામાં આવશે. સિવિલ હોસ્પિટલ દ્વારા ખાતરી આપવામાં આવી છે કે આગામી થોડા જ દિવસોમાં ઓપીડી વિભાગ ઉંદરમુક્ત બની જશે અને દર્દીઓને નિર્ભયપણે સારવાર મળી રહેશે.
