RAJKOT NEWS : રાજકોટ શહેરમાં કાયદો અને વ્યવસ્થાની પરિસ્થિતિ વધુ સુદ્રઢ બનાવવા અને સોશિયલ મીડિયા પર હથિયારોના પ્રદર્શન દ્વારા ભયનું વાતાવરણ ઊભું કરનારા તત્વો સામે રાજકોટ શહેર પોલીસ કમિશનરશ્રીની સૂચના અન્વયે સ્પેશિયલ ઓપરેશન્સ ગ્રુપ દ્વારા એક અત્યંત સફળ ઓપરેશન પાર પાડવામાં આવ્યું છે. શહેરના જાણીતા પ્રવાસન સ્થળ ન્યારી ડેમ રોડ પર પ્રતિબંધિત વિસ્તાર અને જાહેર માર્ગ પર લક્ઝુરિયસ કારમાં વિદેશી હથિયાર સાથે સોશિયલ મીડિયાની ‘રીલ’ બનાવી વટ પાડવાનો પ્રયાસ કરનારા બે શખ્સો અને એક કાયદાના સંઘર્ષમાં આવેલ બાળકિશોરને પોલીસે રંગેહાથ દબોચી લીધા છે. પોલીસે ઘટનાસ્થળેથી અંદાજે રૂપિયા 83.65 લાખથી વધુની કિંમતનો મુદ્દામાલ જપ્ત કરી કાયદેસરની કાર્યવાહી હાથ ધરી છે.
રાજકોટ એસ.ઓ.જી. પોલીસ પેટ્રોલીંગમાં હતી તે દરમિયાન ચોક્કસ અને ખાનગી રાહે બાતમી મળી હતી કે, ન્યારી ડેમ રોડ તરફ જતા જાહેર રસ્તા પર કેટલાક યુવકો કાળા રંગની અત્યંત મોંઘી ફોર્ડ મસ્ટાંગ સ્પોર્ટ્સ કાર સાથે ઊભા છે અને તેમના હાથમાં અસલી પિસ્ટલ/રિવોલ્વર જેવા ઘાતક હથિયાર છે. આ યુવકો જાહેર જનતામાં ભય ફેલાય તે રીતે હથિયાર લહેરાવીને સોશિયલ મીડિયા પ્લેટફોર્મ ઇન્સ્ટાગ્રામ માટે વીડિયો શૂટ (રીલ) કરી રહ્યા છે. બાતમીના આધારે એસ.ઓ.જી.ની ટીમે તાત્કાલિક સ્ટાફ સાથે ન્યારી ડેમ રોડ પર દરોડો પાડ્યો હતો. પોલીસને જોઈને કારમાં બેસી ભાગવાનો પ્રયાસ કરતા શખ્સોને ઘેરાબંધી કરીને ધ્રુમિલ ઠાકોર, આદિત્ય સિંહ રાઠોડ ઘટનાસ્થળે જ ઝડપી લેવામાં આવ્યા હતા.
પોલીસે ઝડપાયેલા શખ્સોની અંગઝડતી અને કારની તલાશી લેતા તેમની પાસેથી એક અત્યંત આધુનિક જર્મન બનાવટની રિવોલ્વર તથા તેની સાથે જીવતા કારતૂસ મળી આવ્યા હતા. પોલીસે હથિયાર રાખવા અંગે લાયસન્સ અથવા પરવાનાની માંગણી કરતા આરોપીઓ કોઈ પણ કાયદેસરના આધાર-પુરાવા રજૂ કરી શક્યા નહોતા. જેથી પોલીસે ગેરકાયદેસર રીતે હથિયારનું સાર્વજનિક પ્રદર્શન કરવા બદલ આ હથિયાર કબ્જે લીધું હતું.
આ સમગ્ર કામગીરી રાજકોટ એસ.ઓ.જી.ના પોલીસ ઇન્સ્પેક્ટર, સબ-ઇન્સ્પેક્ટર તથા એસ.ઓ.જી.ના જાંબાઝ સ્ટાફ દ્વારા સફળતાપૂર્વક કરવામાં આવી છે. આરોપીઓ વિરુદ્ધ આર્મ્સ એક્ટ (હથિયાર ધારો) અને જાહેરનામા ભંગની કલમો હેઠળ ગુનો નોંધી આગળની તપાસ માટે સ્થાનિક પોલીસ સ્ટેશનને સોંપવામાં આવ્યા છે.
