AHEDABAD NEWS : અમદાવાદ શહેરની આસપાસ આવેલા રિંગ રોડ પર અકસ્માતોની હારમાળા અટકવાનું નામ નથી લઈ રહી. તાજેતરમાં ગામડી-અસલાલી રોડ પર એક એવી હૃદયદ્રાવક ઘટના બની છે, જેણે હાઈવે પર મુસાફરી કરતા વાહનચાલકોની સુરક્ષા સામે ફરી એકવાર ગંભીર સવાલો ઉભા કર્યા છે. પોતાની ટ્રકનું ટાયર ચેક કરવા માટે નીચે ઉતરેલા એક ચાલકને અન્ય એક પૂરપાટ ઝડપે આવતી ટ્રકે જોરદાર ટક્કર મારતા, ચાલકનું ઘટનાસ્થળે જ કમકમાટીભર્યું મોત નીપજ્યું છે.
મળતી વિગતો અનુસાર, મૃતક મહેન્દ્રભાઈ શ્યામશંકર પાંડે વ્યવસાયે ટ્રક ડ્રાઈવર હતા અને પોતાની ટ્રક લઈને અમદાવાદ રિંગ રોડ પરથી પસાર થઈ રહ્યા હતા. જ્યારે તેઓ ગામડી થી અસલાલી તરફ જતા માર્ગ પર પહોંચ્યા, ત્યારે તેમને અનુભવાયું કે તેમની ટ્રકના ટાયરમાં પંચર પડ્યું છે અથવા તો પૈડામાં કોઈ યાંત્રિક ખામી સર્જાઈ છે. વાહનની સ્થિતિ તપાસવા માટે તેમણે પોતાની ટ્રક રસ્તાની સાઈડમાં ઊભી રાખી હતી.
ઘટના ગામડી-અસલાલી રોડ પર આવેલા શિવ પાર્કિંગ અને રામદેવ ઢાબાની બિલકુલ સામે બની હતી. મહેન્દ્રભાઈ જ્યારે ટ્રકમાંથી નીચે ઉતરીને પાછળના ટાયર પાસે જઈને પંચર કે અન્ય ખામી તપાસી રહ્યા હતા, ત્યારે કાળ બનીને આવેલી પાછળની એક અજાણી ટ્રકે તેમને જોરદાર અડફેટે લીધા હતા. અકસ્માત એટલો ભયાનક હતો કે મહેન્દ્રભાઈ બે ટ્રક વચ્ચે કચડાઈ ગયા હતા. પાછળથી આવતી ટ્રકની ગતિ એટલી વધારે હતી કે ચાલકને બચવાની તક સુધ્ધાં મળી ન હતી. ટક્કર વાગતા જ મહેન્દ્રભાઈ લોહીલુહાણ હાલતમાં જમીન પર પટકાઈ ગયા હતા અને ગંભીર ઈજાઓ થવાને કારણે ગણતરીની મિનિટોમાં જ તેમનું પ્રાણપંખેરુ ઉડી ગયું હતું.
અકસ્માત સર્જીને અજાણ્યો ટ્રક ચાલક પોતાનું વાહન લઈને ઘટનાસ્થળેથી ફરાર થઈ ગયો હતો. હાઈવે પર અચાનક સર્જાયેલી આ અરાજકતાને કારણે થોડા સમય માટે ટ્રાફિક જામની સ્થિતિ પણ સર્જાઈ હતી. ઘટનાની જાણ થતા જ અસલાલી પોલીસ અને ટ્રાફિક પોલીસનો કાફલો તાત્કાલિક સ્થળ પર પહોંચી ગયો હતો. પોલીસે મૃતક મહેન્દ્રભાઈના મૃતદેહને પોસ્ટમોર્ટમ માટે નજીકની હોસ્પિટલમાં ખસેડવાની તજવીજ હાથ ધરી હતી. પોલીસે ઘટનાસ્થળનું પંચનામું કરી, હિટ એન્ડ રન કરનાર અજાણ્યા ટ્રક ચાલક વિરુદ્ધ ગુનો દાખલ કર્યો છે.
