LIFE STYLE NEWS: આજના આધુનિક અને વ્યસ્ત જીવનમાં ઘરમાં રોજ કંઈક નવું, સ્વાદિષ્ટ અને પૌષ્ટિક ખાવાની ઈચ્છા દરેક પરિવારમાં જોવા મળે છે. ખાસ કરીને ગૃહિણીઓ માટે રોજ-રોજ લંચ કે ડિનરમાં શું નવું બનાવવું તે એક મોટો સવાલ હોય છે. આ સમસ્યાના ઉત્તમ ઉકેલ તરીકે પરંપરાગત ગુજરાતી વાનગી ‘દાળ ઢોકળી’ એક બેસ્ટ ઓપ્શન સાબિત થઈ શકે છે. સ્વાદિષ્ટ હોવાની સાથે-સાથે આ ડિશ સ્વાસ્થ્ય માટે પણ ખૂબ જ ફાયદાકારક છે. આ એક કમ્ફર્ટ ફૂડ છે જેને દિવસના કે રાત્રિના ભોજનમાં એક કમ્પ્લીટ મીલ (સંપૂર્ણ આહાર) તરીકે સરળતાથી પીરસી શકાય છે.
દાળ ઢોકળી એક એવી લોકપ્રિય ડિશ છે જે ઘરમાં રહેલી સાદી સામગ્રી જેવી કે તુવેર દાળ, ઘઉંનો લોટ અને નિયમિત મસાલાના યોગ્ય મિશ્રણથી તૈયાર થાય છે. આ સ્વાદિષ્ટ વાનગી બાળકોથી લઈને વડીલો સુધી ઘરના તમામ સભ્યોને એકસરખી પસંદ આવે છે. લાઈટ હોવા છતાં આ વાનગી લાંબા સમય સુધી પેટ ભરેલું રાખે છે અને પ્રોટીન તેમજ કાર્બોહાઈડ્રેટ્સનો ઉત્તમ સ્ત્રોત પૂરો પાડે છે.
પરંપરાગત રેસીપી બનાવવા માટે સૌથી મહત્વની સામગ્રી તુવેર દાળ છે, જેને બાફીને મસાલેદાર અને ખાટી-મીઠી દાળ તૈયાર કરવામાં આવે છે. બીજી બાજુ ઘઉંના લોટમાં અજમો, હળદર, મરચું અને મોણ નાખીને કડક લોટ બાંધવામાં આવે છે, જેની પાતળી રોટલી વણીને ચોરસ કે ડાયમંડ આકારના ટુકડા (ઢોકળી) કરવામાં આવે છે. આ ઉકળતી દાળમાં ઢોકળી ઉમેરીને તેને ધીમા તાપે ચડવા દેવામાં આવે છે. છેલ્લે ગરમાગરમ દાળ ઢોકળી પર શુદ્ધ ઘી, સીંગદાણા અને કોથમીર સ્પ્રિંકલ કરીને સર્વ કરવામાં આવે છે.
રસોઈના અખતરાઓમાં જો તમે કંઈક નવું અને અસલી ગુજરાતી સ્વાદ માણવા માંગતા હોવ, તો આ સરળ રેસીપી આજે જ લંચ કે ડિનરમાં અજમાવવા જેવી છે.
