BSNL Satellite Phone : ભારતીય સંચાર નિગમ લિમિટેડ (BSNL) દ્વારા એક અત્યાધુનિક સેટેલાઈટ ફોન લોન્ચ કરવામાં આવ્યો છે જે દૂર-દરાજ અને નેટવર્ક વિહોણા વિસ્તારોમાં વાતચીત કરવાનું સરળ બનાવશે. આ ફોનનું સૌથી મોટું આકર્ષણ એ છે કે તે મોબાઈલ ટાવર પર આધારિત નથી, પરંતુ સીધો અવકાશમાં રહેલા સેટેલાઈટ સાથે જોડાય છે. આ ઉપકરણની કિંમત 1.34 લાખ રૂપિયા નિર્ધારિત કરવામાં આવી છે. સામાન્ય નાગરિકોને આ કિંમત વધુ લાગી શકે છે, પરંતુ તે સામાન્ય સ્માર્ટફોન નથી. તેને ખાસ કરીને પહાડી વિસ્તારો, ગાઢ જંગલો, દરિયાઈ સીમાઓ કે એવી જગ્યાઓ માટે બનાવવામાં આવ્યો છે જ્યાં સામાન્ય મોબાઈલ નેટવર્ક પહોંચવું અશક્ય છે. કુદરતી આપત્તિના સમયમાં જ્યારે તમામ મોબાઈલ નેટવર્ક ઠપ થઈ જાય છે, ત્યારે આ સેટેલાઈટ ફોન એક જીવનરક્ષક સાબિત થઈ શકે છે.
ટેકનોલોજી અને કાર્યક્ષમતા
સામાન્ય ફોન જ્યારે કોલ કરવા માટે નજીકના મોબાઈલ ટાવર સાથે જોડાય છે, ત્યારે આ સેટેલાઈટ ફોન સીધો ઓર્બિટમાં રહેલા સેટેલાઈટ સાથે સંપર્ક સાધે છે. આ કારણ છે કે દુનિયાના કોઈપણ ખૂણેથી આ ફોન દ્વારા અવાજની સ્પષ્ટ આપ-લે કરી શકાય છે. BSNL લાંબા સમયથી ગ્લોબલ સેટેલાઈટ ફોન સર્વિસ (GSPS) આપી રહ્યું છે, પરંતુ હવે કંપનીએ તેને વ્યાપક રીતે રજૂ કર્યો છે. જો કે, આ ફોન એન્ડ્રોઈડ સ્માર્ટફોન જેવો નથી, જેમાં ટચસ્ક્રીન, સોશિયલ મીડિયા એપ કે હાઈ-સ્પીડ ઈન્ટરનેટ જેવી સુવિધાઓ મળે. તેનો મુખ્ય હેતુ અત્યંત વિકટ પરિસ્થિતિઓમાં ભરોસાપાત્ર વોઈસ કોલિંગ અને SMS સેવા આપવાનો છે. સુરક્ષા એજન્સીઓ, આપત્તિ વ્યવસ્થાપન ટીમો, ઓઈલ અને ગેસ ક્ષેત્રના કાર્યકરો અને સરહદી વિસ્તારોમાં રહેતા લોકો માટે આ ફોન ખૂબ જ ઉપયોગી સાધન છે.
નિયમો અને પ્લાન્સની વિગતો
આ સેટેલાઈટ ફોન મેળવવા માટે સરકારી નિયમો મુજબ સામાન્ય મોબાઈલ કનેક્શનની જેમ જ ઓળખ અને પુરાવાઓ આપવા અનિવાર્ય છે. યુઝરે એ પણ સ્પષ્ટ કરવું પડે છે કે તેઓ આ ફોનનો ઉપયોગ કયા વિસ્તારમાં, કેટલા સમય માટે અને કયા હેતુથી કરશે. ફક્ત 1.34 લાખ રૂપિયામાં ફોન ખરીદવાથી કામ પૂરું નથી થતું, તેની સાથે BSNL નો વિશેષ સેટેલાઈટ સર્વિસ પ્લાન પણ લેવો પડે છે, જેમાં માસિક ભાડું અને કોલ ચાર્જ અલગથી લાગે છે. સરકાર અને કોમર્શિયલ ગ્રાહકો માટે કંપનીએ અલગ-અલગ પ્લાન તૈયાર કર્યા છે. હાલના પ્રીમિયમ સ્માર્ટફોનમાં આવતી સેટેલાઈટ મેસેજિંગ સુવિધા કરતાં આ ફોન અલગ છે, કારણ કે તે માત્ર ઈમરજન્સી મેસેજિંગ પૂરતો સીમિત નથી, પરંતુ પૂરેપૂરી વોઈસ કોલિંગ અને રેગ્યુલર મેસેજિંગની ક્ષમતા ધરાવે છે. આમ, નેટવર્ક વગર પણ સંપર્કમાં રહેવા માટે આ એક અત્યંત સુરક્ષિત અને અસરકારક વિકલ્પ બની રહેશે.
