વલભીપુર કેનાલમાં ન્હાવા પડેલા યુવકનું કરુણ મોત: પિતાએ ગુમાવ્યા બંને પુત્ર, પરિવાર પર તૂટ્યો આભ

Surendranagar News : સુરેન્દ્રનગર જિલ્લાના લખતર તાલુકામાંથી એક અત્યંત હૃદયદ્રાવક અને કમનસીબ ઘટના સામે આવી છે, જેમાં વલભીપુર બ્રાન્ચ કેનાલમાં ન્હાવા પડેલા એક 28 વર્ષીય યુવકનું ડૂબી જવાથી મૃત્યુ થયું છે. આ દુર્ઘટનાને કારણે એક તરફ પરિવારમાં શોકનું મોજું ફરી વળ્યું છે, તો બીજી તરફ પિતાએ પોતાના બંને સંતાનોને પાણીમાં ગુમાવતા સમગ્ર પંથકમાં અરેરાટી વ્યાપી ગઈ છે. આ ઘટનાની વિગત એવી છે કે, લખતરના ભાલાળા ગામમાં એન્ટ્રી ગેટ બનાવવાનું કામ ચાલી રહ્યું હતું, જેમાં વિશાલભાઈ લાલજીભાઈ સાદીયા સહિતના શ્રમિકો કામ કરી રહ્યા હતા. બપોરના સમયે કામમાંથી વિરામ લઈને વિશાલભાઈ પોતાના બે મિત્રો કિશોરભાઈ માવજીભાઈ બગડા અને જયરાજભાઈ કાંતિભાઈ સોલંકી સાથે ભાલાળા અને તનમનીયા ગામ વચ્ચેથી પસાર થતી વલભીપુર બ્રાન્ચ કેનાલ પર ન્હાવા માટે પહોંચ્યા હતા.

અકસ્માત અને નિષ્ફળ પ્રયાસો

કેનાલ પર પહોંચ્યા બાદ વિશાલભાઈ ત્યાં બાંધેલું એક દોરડું પકડીને પાણીમાં ન્હાવાનો પ્રયાસ કરી રહ્યા હતા. કમનસીબે, તે સમયે અચાનક દોરડું તૂટી જતાં વિશાલભાઈ પોતાનું સંતુલન ગુમાવી બેઠા હતા અને સીધા જ નર્મદા કેનાલના ઊંડા પાણીમાં ગરકાવ થઈ ગયા હતા. પોતાના મિત્રને નજર સમક્ષ ડૂબતો જોઈને સાથે રહેલા બંને મિત્રો ગભરાઈ ગયા હતા અને વિશાલભાઈને બચાવવા માટે ભારે મથામણ કરી હતી, પરંતુ કેનાલના પાણીનો પ્રવાહ અને ઊંડાઈને કારણે તેઓ નિષ્ફળ રહ્યા હતા. મિત્રોની ચીસાચીસ સાંભળીને તનમનીયા ગામના સ્થાનિક યુવાનો તાત્કાલિક ઘટનાસ્થળે દોડી આવ્યા હતા અને તાત્કાલિક ધોરણે પાણીમાં શોધખોળ શરૂ કરી હતી.

રેસ્ક્યુ અને પોલીસ કાર્યવાહી

ઘટનાની જાણ થતાં જ લખતર પોલીસ સ્ટેશનના હેડ કોન્સ્ટેબલ વાલજી ભુવોતરા, કોન્સ્ટેબલ હિતેશ અને મેહુલ સહિતનો સ્ટાફ તાત્કાલિક ઘટનાસ્થળે પહોંચી ગયો હતો. તનમનીયા ગામના તરવૈયા યુવાનો દ્વારા અંદાજે 1 કલાક સુધી ભારે જહેમત ઉઠાવવામાં આવી હતી, ત્યારબાદ વિશાલભાઈના મૃતદેહને કેનાલમાંથી બહાર કાઢવામાં સફળતા મળી હતી. પોલીસે મૃતદેહનો કબજો મેળવીને પોસ્ટમોર્ટમ માટે લખતરની સરકારી હોસ્પિટલ ખાતે ખસેડ્યો હતો, જ્યાં ફરજ પરના તબીબોએ તપાસ કરી વિશાલભાઈને મૃત જાહેર કર્યા હતા. હાલમાં પોલીસે આ મામલે અકસ્માતે મોતનો ગુનો નોંધીને કાયદેસરની કાર્યવાહી હાથ ધરી છે.

પરિવાર પર આભ તૂટી પડ્યું

આ ઘટના માત્ર એક અકસ્માત નથી, પરંતુ એક પરિવાર માટે અસહ્ય દુઃખની ઘડી છે. મૃતક વિશાલભાઈ પરણિત હતા અને તેમના પરિવારમાં 9 મહિનાની એક નાની દીકરી પણ છે, જેણે હવે પિતાની છત્રછાયા ગુમાવી દીધી છે. સૌથી વધુ કરુણ બાબત એ છે કે, આ પહેલા વિશાલભાઈના સગા પણ વતનમાં પાણીમાં ડૂબી જવાથી મૃત્યુ પામ્યા હતા. પિતા લાલજીભાઈ સાદીયાએ આ અગાઉ પોતાનો એક દીકરો પાણીમાં ગુમાવ્યો હતો અને હવે બીજા દીકરાનું પણ પાણીમાં ડૂબી જવાથી મોત થતાં લાલજીભાઈ ભાંગી પડ્યા છે. પોતાના બંને પુત્રોને આ રીતે ગુમાવનાર પિતાની સ્થિતિ જોઈને ત્યાં હાજર દરેક લોકોની આંખો ભીની થઈ ગઈ હતી. 28 વર્ષના યુવાનના નિધનથી પરિવારનો આધારસ્તંભ છીનવાઈ ગયો છે અને આખા ગામમાં શોકનો માહોલ છવાઈ ગયો છે.