SURAT NEWS: સુરત શહેરમાં ખાડી પૂરના કારણે સર્જાયેલી જળબંબોળની સ્થિતિએ લાખો નાગરિકોને મુશ્કેલીમાં મૂકી દીધા છે. નીચાણવાળા વિસ્તારો અને સોસાયટીઓ બેથી ત્રણ ફૂટ પાણીમાં ગરકાવ થઈ જતાં જનજીવન સંપૂર્ણપણે ઠપ્પ થઈ ગયું છે. લોકો પોતાના ઘરોની બહાર નીકળી શકતા નથી, જેના કારણે જીવનજરૂરિયાતની ચીજવસ્તુઓની ભારે અછત ઊભી થઈ છે. પૂરની આ ભયાવહ સ્થિતિ વચ્ચે ડિંડોલી વિસ્તારમાં દૂધની અછત વર્તાતા નાગરિકો વચ્ચે પડાપડીના દ્રશ્યો સર્જાયા છે, જેને પગલે કાયદો અને વ્યવસ્થા જાળવવા પોલીસ તૈનાત કરવી પડી છે. આ ગંભીર માનવસર્જિત આપત્તિ મુદ્દે હવે રાજકારણ પણ ગરમાયું છે અને કોંગ્રેસે શાસક પક્ષ ભાજપ અને વહીવટી તંત્રની બેદરકારીને આડે હાથ લીધી છે.
ડિંડોલીમાં જીવનજરૂરિયાતની વસ્તુઓ માટે હાહાકાર: દૂધના ટેમ્પો પાસે પોલીસ તૈનાત
ખાડી પૂરના પાણી રહેણાંક વિસ્તારો, સોસાયટીઓ અને એપાર્ટમેન્ટ્સના ગ્રાઉન્ડ ફ્લોર સુધી ભરાઈ જવાથી હજારો પરિવારો પોતાના ઘરોમાં કેદ થઈ ગયા છે. રસ્તાઓ બંધ હોવાના કારણે જીવનજરૂરિયાતની વસ્તુઓ ખરીદવા માટે લોકો ભારે હાલાકીનો સામનો કરી રહ્યા છે. ડિંડોલી વિસ્તારમાં જ્યારે દૂધ ભરેલો ટેમ્પો આવી પહોંચ્યો ત્યારે દૂધ મેળવવા માટે સેંકડો લોકોની ભીડ ઉમટી પડી હતી અને ભારે પડાપડીના દ્રશ્યો સર્જાયા હતા. પરિસ્થિતિ બેકાબૂ ન બને તે માટે તાત્કાલિક પોલીસ કાફલાને સ્થળ પર બોલાવવો પડ્યો હતો અને પોલીસની દેખરેખ હેઠળ દૂધનું વિતરણ કરવામાં આવ્યું હતું. શાકભાજી, પીવાનું પાણી અને દૂધ જેવી મૂળભૂત સુવિધાઓ માટે લોકો રસ્તા પર ઉતરી આવવા મજબૂર બન્યા છે.
આ કુદરતી આફત નથી, તંત્રની ઘોર નિષ્ફળતા છે: કોંગ્રેસ નેતા દર્શનકુમાર નાયક
સુરતના લાખો નાગરિકો, વેપારીઓ અને ખેડૂતોની આ દુર્દશાને લઈને કોંગ્રેસે સરકાર પર સીધો પ્રહાર કર્યો છે. કોંગ્રેસના અગ્રણી નેતા દર્શનકુમાર નાયકે આક્ષેપ કર્યો છે કે આ ખાડી પૂર કોઈ કુદરતી આપત્તિ નથી, પરંતુ સંપૂર્ણપણે વહીવટી તંત્રની નિષ્ફળતાનું પરિણામ છે. તેમણે જણાવ્યું કે, છેલ્લા ત્રણ વર્ષથી સ્થાનિક પ્રજા અને વિપક્ષ દ્વારા ખાડીઓની સફાઈ અને ઊંડી કરવા અંગે સતત ચેતવણી આપવામાં આવી રહી હતી, તેમ છતાં સુરત મહાનગરપાલિકા અને સિંચાઈ વિભાગનું તંત્ર ઘોર નિદ્રામાં રહ્યું. તંત્રની આ આળસ અને આંખ આડા કાન કરવાની નીતિના કારણે આજે લાખો નિર્દોષ સુરતીઓ આર્થિક અને શારીરિક મુશ્કેલીઓ ભોગવી રહ્યા છે.
કરોડોના વિકાસના દાવા ક્યાં ગયા? કોંગ્રેસના વેધક સવાલો
કોંગ્રેસે સુરત સ્માર્ટ સિટી અને ભાજપ સરકારના પ્રી-મોન્સૂન કામગીરીના પોકળ દાવાઓ સામે સવાલો ઉઠાવતા પૂછ્યું છે કે, દર વર્ષે કાગળ પર બતાવવામાં આવતા કરોડો રૂપિયાના વિકાસના કામો આખરે ગયા ક્યાં? સરકાર દ્વારા ખાડી સફાઈ અને ડ્રેનેજ સિસ્ટમ પાછળ જે કરોડોના અંદાજપત્ર મંજૂર કરવામાં આવે છે, તેનું વાસ્તવિક ધરાતલ પર કોઈ પરિણામ દેખાતું નથી. આ પૂર પાછળ ગેરકાયદેસર દબાણો અને કુદરતી જળમાર્ગોની સફાઈમાં રાખવામાં આવેલી બેદરકારી મુખ્ય કારણ છે. કોંગ્રેસે માંગ કરી છે કે આ સમગ્ર ભ્રષ્ટાચાર અને લાપરવાહી અંગે એક સ્વતંત્ર ઉચ્ચસ્તરીય સમિતિ દ્વારા તપાસ કરવામાં આવે.
જવાબદાર અધિકારીઓ સામે કડક પગલાં અને જનઆંદોલનની ચીમકી
લાખો વેપારીઓના ધંધા-રોજગાર ઠપ્પ થવા અને ખેડૂતોના પાકને થયેલા વ્યાપક નુકસાન બદલ કોંગ્રેસે આક્રોશ વ્યક્ત કર્યો છે. પક્ષે માંગ કરી છે કે માત્ર પૂરના પાણી ઓસરવાની રાહ જોવાને બદલે, જે અધિકારીઓની બેદરકારીને કારણે આ પરિસ્થિતિ સર્જાઈ છે તેમની જવાબદારી નક્કી કરી તેમની સામે તાત્કાલિક શિક્ષાત્મક પગલાં લેવામાં આવે. કોંગ્રેસે સરકારને સ્પષ્ટ શબ્દોમાં ચેતવણી આપી છે કે જો આ મામલે ટૂંક સમયમાં કોઈ નક્કર ન્યાયિક અને વહીવટી કાર્યવાહી કરવામાં નહીં આવે, તો કોંગ્રેસ પક્ષ જનતાના હિતમાં રસ્તા પર ઉતરીને ઉગ્ર ‘જનઆંદોલન’ છેડશે.
