ડીસામાં સરપંચના પતિનો ભ્રષ્ટાચારી ખેલ ફેલ : માટી ખોદકામ માટે લાંચ લેતા એસીબીએ રંગેહાથ ઝડપ્યા

Banaskantha News : બનાસકાંઠા જિલ્લાના ડીસા તાલુકામાં ભ્રષ્ટાચાર વિરોધી બ્યુરો (ACB) દ્વારા કરવામાં આવેલી એક સફળ કાર્યવાહીએ સરકારી કામકાજમાં ચાલતી ગેરરીતિઓનો પર્દાફાશ કર્યો છે. આ સમગ્ર મામલો ધરપડા ગ્રામ પંચાયત સાથે જોડાયેલો છે, જ્યાં માટી ખોદકામની મંજૂરી મેળવવાના બદલામાં લાંચની માંગણી કરવામાં આવી હતી. પ્રાપ્ત માહિતી અનુસાર, ફરિયાદીને પોતાના અંગત કામ માટે માટીની જરૂરિયાત હતી, જેના માટે તેમણે નિયમાનુસાર ધરપડા ગ્રામ પંચાયતનો સંપર્ક સાધ્યો હતો. પંચાયત દ્વારા સિંચાઈ વિભાગને માટી ઉપાડવા માટે ઠરાવ કરીને અરજી પણ કરવામાં આવી હતી. જોકે, આ વહીવટી પ્રક્રિયા દરમિયાન એક ચોંકાવનારી બાબત સામે આવી હતી, જેમાં ધરપડા ગામના સરપંચના પતિ વધુજી સુરાજી સોલંકીએ ફરિયાદી પાસે ગેરકાયદેસર રીતે લાંચની માંગણી કરી હતી.

માટીના ખોદકામ માટે કરવામાં આવી હતી લાંચની માંગ

આરોપી વધુજી સુરાજી સોલંકીએ ફરિયાદીને તળાવમાંથી માટી ખોદકામ કરવા દેવાના બદલામાં 1,10,000 રૂપિયાની લાંચની માંગણી કરી હતી. આ રકમ સરકારી કામ માટે હોવા છતાં, વ્યક્તિગત સ્વાર્થ ખાતર આટલી મોટી રકમ માંગવામાં આવતા ફરિયાદી ચોંકી ઉઠ્યા હતા. તેઓ કોઈ પણ સંજોગોમાં લાંચ આપવા માંગતા ન હતા, તેથી તેમણે લાંચીયાઓને પાઠ ભણાવવા માટે બનાસકાંઠા એસીબીનો સંપર્ક કર્યો અને પોતાની ફરિયાદ નોંધાવી. ફરિયાદીની આ જાગૃતતાને પગલે એસીબીએ ત્વરિત કાર્યવાહીનું આયોજન કર્યું હતું. ફરિયાદીની ફરિયાદના આધારે એસીબીની ટીમે લાંચનું સફળ છટકું ગોઠવ્યું હતું. આ છટકા દરમિયાન આરોપીને લાંચની રકમ લેવા માટે જૂના ડીસા ખાતે આવેલી ઢુવા ચોકડી પર બોલાવવામાં આવ્યો હતો.

સ્થળ પર જ લાંચની રકમ સાથે ઝડપાયા આરોપી

નક્કી કરેલા સ્થળ પર પહોંચ્યા બાદ આરોપીએ ફરીથી ફરિયાદી સાથે હેતુલક્ષી વાતચીત કરી હતી અને લાંચની રકમ 1,10,000 રૂપિયા સ્વીકારી હતી. જેવી રકમ આરોપીના હાથમાં આવી કે તરત જ અગાઉથી ગોઠવાયેલી એસીબીની ટીમે ઓચિંતી રેડ કરી આરોપીને રંગેહાથ પકડી પાડ્યો હતો. એસીબી દ્વારા આરોપી પાસેથી સ્વીકારેલી 1,10,000 રૂપિયાની રકમ પણ રિકવર કરવામાં આવી હતી. આ સમગ્ર ઓપરેશન બનાસકાંઠા એસીબી પોલીસ સ્ટેશનના પોલીસ ઇન્સ્પેક્ટર બી.જે.જોષીના નેતૃત્વમાં પાર પાડવામાં આવ્યું હતું, જ્યારે સમગ્ર ટ્રેપનું સુપરવિઝન એસીબી બોર્ડર એકમ, ભુજના મદદનિશ નિયામક કે.એચ.ગોહિલ દ્વારા કરવામાં આવ્યું હતું. આ ઉપરાંત, એસીબી રાજકોટ એકમના નાયબ નિયામક બલદેવસિંહ વાઘેલા પણ આ કાર્યવાહીમાં જોડાયા હતા. આ સફળ ટ્રેપ બાદ સમગ્ર પંથકમાં ભ્રષ્ટાચારીઓમાં ફફડાટ વ્યાપી ગયો છે અને તંત્રમાં લાંચ લેતા લોકો માટે આ એક મોટો સંદેશ છે કે ભ્રષ્ટાચારના આ ખેલમાં હવે કોઈ પણ બક્ષવામાં આવશે નહીં. હાલ એસીબી દ્વારા આગળની કાયદેસરની કાર્યવાહી હાથ ધરવામાં આવી છે.