Rajula News : અમરેલી જિલ્લાના રાજુલા પંથકમાં આવેલ ખાંભલીયા ગામમાં એક અત્યંત રોમાંચક અને માનવતાને સ્પર્શી જાય તેવી ઘટના સામે આવી છે. આતાભાઇ વાઘ નામના ખેડૂતના ખેતરની વાડીમાં આવેલ 50 ફૂટ ઊંડા ખુલ્લા કૂવામાં એક સિંહણ અને એક શ્વાન એકસાથે ખાબક્યા હતા. મળતી માહિતી અનુસાર, આ સિંહણ શિકારની શોધમાં હતી અને એક શ્વાનનો પીછો કરી રહી હતી. શ્વાનને ઝડપી લેવાની ઉતાવળમાં સિંહણ પોતાનું સંતુલન ગુમાવી બેઠી અને સીધી કૂવાની અંદર જઈ પડી. તેની પહેલાં શ્વાન પણ કૂવામાં ખાબકતા સ્થળ પર અફરાતફરીનો માહોલ સર્જાયો હતો. આ ઘટનાની જાણ આસપાસના ગ્રામજનોને થતાં જ મોટી સંખ્યામાં લોકો કૂવા પાસે એકઠા થઈ ગયા હતા અને વનવિભાગને તાત્કાલિક જાણ કરી હતી.
સિંહણ અને શ્વાન વચ્ચેનું અનોખું મૌન
સૌથી નવાઈની વાત તો એ છે કે, સામાન્ય રીતે સિંહણ તેના શિકારને ક્યારેય છોડતી નથી, પરંતુ આ કિસ્સામાં કુદરતનો અલગ જ નઝારો જોવા મળ્યો હતો. 50 ફૂટ ઊંડા કૂવામાં છેલ્લા 5 કલાકથી સિંહણ અને શ્વાન એકબીજાની સાથે હતા, છતાં સિંહણે શ્વાન પર કોઈપણ પ્રકારનો હુમલો કર્યો ન હતો. કૂવાના પાણીમાં ડૂબી ન જવા માટે બંને જીવ બચાવવાની કવાયત કરી રહ્યા હતા. મોત સામે સામે દેખાતું હોવાથી કદાચ સિંહણ અને શ્વાન બંને પોતાના અસ્તિત્વ ટકાવી રાખવા માટે સંઘર્ષમાં મગ્ન હતા, જેના કારણે બંને વચ્ચેનું વેર ભૂલાઈ ગયું હોય તેમ લાગતું હતું. આ દ્રશ્ય જોઈને ત્યાં હાજર તમામ લોકો પણ સ્તબ્ધ થઈ ગયા હતા કે કેવી રીતે એક શિકારી અને શિકાર કુદરતી આપત્તિમાં એકમેકના સાથી બનીને બેઠા હતા.
વનવિભાગનું દિલધડક રેસ્ક્યુ ઓપરેશન
ઘટનાની જાણ થતા જ રાજુલા રેન્જના વનવિભાગની ટીમ તાત્કાલિક ઘટનાસ્થળે દોડી આવી હતી. અધિકારીઓએ પરિસ્થિતિની ગંભીરતા સમજીને સિંહણને સુરક્ષિત રીતે બહાર કાઢવા માટે પ્લાન તૈયાર કર્યો હતો. 50 ફૂટ ઊંડો કૂવો હોવાને કારણે રેસ્ક્યુ ઓપરેશન અત્યંત જોખમી હતું. વનવિભાગની ટીમે ભારે જહેમત અને અત્યાધુનિક સાધનોની મદદથી પહેલા સિંહણને બહાર કાઢવા માટેનું ઓપરેશન શરૂ કર્યું હતું. આ દિલધડક ઓપરેશન દરમિયાન સિંહણ ગુસ્સામાં ન આવી જાય તેનું ખાસ ધ્યાન રાખવામાં આવ્યું હતું. લાંબી મથામણના અંતે વનવિભાગની ટીમે સિંહણને સહીસલામત રીતે પાંજરામાં લઈ બહાર કાઢી હતી. સિંહણને બહાર કાઢ્યા બાદ ત્યારબાદ ટીમે શ્વાનને પણ સુરક્ષિત રીતે કૂવામાંથી બહાર કાઢ્યું હતું. રાજુલા વનવિભાગની ત્વરિત કાર્યવાહીને કારણે બંને પ્રાણીઓના જીવ બચી શક્યા હતા અને આખી ઘટનાનો સુખદ અંત આવ્યો હતો.
