RAILWAY NEWS: મુસાફરો માટે પ્રવાસનું આયોજન વધુ સ્માર્ટ, ઝડપી અને તણાવમુક્ત બનાવવા માટે રેલવે મંત્રાલય આગામી ઓગસ્ટ મહિનાથી એક ક્રાંતિકારી પરિવર્તન કરવા જઈ રહ્યું છે. ભારતીય રેલવે છેલ્લા 40 વર્ષથી ચાલી આવતી પરંપરાગત ટિકિટિંગ પ્રણાલીને અલવિદા કહીને આર્ટિફિશિયલ ઇન્ટેલિજન્સ અને આધુનિક ક્લાઉડ-બેઝ્ડ સર્વરથી સજ્જ નવી ટેકનોલોજી અપનાવવા જઈ રહ્યું છે. આ નવી સિસ્ટમના અમલીકરણથી તત્કાલ બુકિંગ દરમિયાન સર્વર ડાઉન થવાની સમસ્યાનો કાયમી નિકાલ આવશે અને મુસાફરોને ૯૪% ચોકસાઈ સાથે વેઇટિંગ ટિકિટ કન્ફર્મ થવાની આગાહી પણ મળી શકશે.
40 વર્ષ જૂની ‘PRS’ સિસ્ટમ બદલવાનું મુખ્ય કારણ
ભારતીય રેલવેની વર્તમાન પેસેન્જર રિઝર્વેશન સિસ્ટમની શરૂઆત વર્ષ 1986માં કરવામાં આવી હતી. આ લાંબા ગાળા દરમિયાન સિસ્ટમમાં સમયાંતરે અપગ્રેડેશન ચોક્કસ કરાયા, પરંતુ તેનું મૂળભૂત માળખું યથાવત રહ્યું હતું. વર્ષ 2002માં જ્યારે ઓનલાઇન ટિકિટ બુકિંગની શરૂઆત થઈ, ત્યારે ડિજિટલ ટ્રાન્ઝેક્શનનો વ્યાપ વધ્યો હતો. હાલના આંકડા મુજબ, રેલવેની કુલ ટિકિટોમાંથી આશરે 88% ટિકિટો ઓનલાઈન માધ્યમથી બુક થાય છે. મુસાફરોની આ જંગી ડિજિટલ સંખ્યા અને ટ્રાફિક લોડને વહન કરવામાં જૂનું માળખું ટૂંકું પડી રહ્યું હોવાથી, આ અત્યાધુનિક પરિવર્તન કરવાનો નિર્ણય લેવાયો છે.
નવા પ્લેટફોર્મની વિશેષતાઓ અને મુસાફરોને થનારા ફાયદા
- ઝડપી બુકિંગ અને પાવરફુલ ક્લાઉડ સર્વર: તહેવારોની સિઝનમાં અથવા સવારે ૧૧ વાગ્યે ‘તત્કાલ ટિકિટ’ બુક કરતી વખતે વેબસાઇટ ધીમી પડવાની, પેમેન્ટ અટકી જવાની કે સર્વર ક્રેશ થવાની ફરિયાદો રહેતી હતી. નવી પેસેન્જર રિઝર્વેશન સિસ્ટમ અત્યંત આધુનિક ક્લાઉડ ટેકનોલોજી પર આધારિત હોવાથી તેની પ્રોસેસિંગ ક્ષમતા અનેક ગણી વધારે છે. આનાથી સર્વર પરનું દબાણ ઘટી જશે અને મિનિટોનું કામ સેકન્ડોમાં પૂર્ણ થશે.
- AI બદલશે ગેમ: 94% ચોકસાઈ સાથે વેઇટિંગ કન્ફર્મેશન પ્રિડિક્શન: નવી સિસ્ટમનું સૌથી મોટું આકર્ષણ આર્ટિફિશિયલ ઇન્ટેલિજન્સ (AI) આધારિત ટિકિટ કન્ફર્મેશનની આગાહી છે. અગાઉ રેલવેની સિસ્ટમમાં વેઇટિંગ ટિકિટ કન્ફર્મ થશે કે નહીં તેની આગાહી કરવાની ચોકસાઈ માત્ર ૫૩% જેટલી જ હતી. હવે AI ના ઉપયોગથી આ ચોકસાઈનો દર સીધો 94% સુધી પહોંચાડવામાં આવ્યો છે.
મુસાફરીનું આયોજન થશે વધુ સરળ
નવી આર્ટિફિશિયલ ઇન્ટેલિજન્સ સિસ્ટમના કારણે મુસાફરો ટિકિટ બુક કરતી વખતે જ સચોટતાથી જાણી શકશે કે તેમની વેઇટિંગ ટિકિટ કન્ફર્મ થવાની શક્યતા કેટલી છે. આનાથી કરોડો મુસાફરો કોઈ પણ જાતની અનિશ્ચિતતા વગર પોતાની મુસાફરીનું પૂર્વ-આયોજન વધુ સારી રીતે કરી શકશે અને છેલ્લી ઘડીએ થતી હાલાકીમાંથી બચી શકશે. રેલવે મંત્રાલય ઓગસ્ટ મહિનાના પ્રથમ સપ્તાહથી આ નવી સિસ્ટમ તબક્કાવાર રીતે દેશભરમાં લાગુ કરવા જઈ રહ્યું છે.
