AMRELI NEWS: અમરેલી જિલ્લાના રાજુલા તાલુકાના વાવેરા ગામમાં એક મહાકાય અજગર દેખા દેતાં સ્થાનિક રહીશોમાં ભારે ફફડાટ અને ભયનો માહોલ ફેલાઈ ગયો હતો. રહેણાંક વિસ્તારની નજીક જ અંદાજે 10 ફૂટ લાંબો અને વજનદાર અજગર આવી ચડતા લોકોના જીવ તાળવે ચોંટ્યા હતા. જોકે, ઘટનાની જાણ થતાં જ વનવિભાગની ટીમે તાત્કાલિક સ્થળ પર પહોંચીને ભારે જહેમત બાદ દિલધડક રેસ્ક્યૂ ઓપરેશન પાર પાડ્યું છે, જેનાથી ગ્રામજનોએ રાહતનો શ્વાસ લીધો છે.
ખેતર-રહેણાંક વિસ્તારની નજીક અજગર દેખાતા અફરાતફરી
પ્રાપ્ત માહિતી અનુસાર, વાવેરા ગામના સીમ વિસ્તાર અને રહેણાંક મકાનોની નજીક સ્થાનિક લોકોએ આ વિશાળકાય અજગરને સરકતો જોયો હતો. સામાન્ય રીતે શાંત દેખાતા આ વન્યજીવનું કદ એટલું મોટું હતું કે તેને જોઈને સ્થાનિકોમાં ગભરાટ ફેલાઈ ગયો હતો અને જોતજોતામાં ત્યાં લોકોના ટોળેટોળાં એકઠા થઈ ગયા હતા. કોઈ અનિચ્છનીય ઘટના ન ઘટે તે માટે જાગૃત નાગરિકોએ તાત્કાલિક રાજુલા વનવિભાગને આ અંગે જાણ કરી હતી.
વનવિભાગનું દિલધડક રેસ્ક્યૂ ઓપરેશન
માહિતી મળતાની સાથે જ વનવિભાગના રેસ્ક્યૂઅર્સ અને વનકર્મીઓનો કાફલો આધુનિક સાધનો સાથે વાવેરા ગામે દોડી આવ્યો હતો. અજગર કદમાં ઘણો મોટો અને વજનદાર હોવાથી તેને પકડવો વનવિભાગ માટે પણ પડકારજનક હતો. વનકર્મીઓએ ભારે સાવચેતી પૂર્વક અને કુશળતાપૂર્વક અજગરને કાબૂમાં લેવાના પ્રયાસો શરૂ કર્યા હતા. અજગરે બચાવવા માટે હિલચાલ તેજ કરી દીધી હતી, પરંતુ વનવિભાગની ટીમે પોતાની સૂઝબૂઝથી આ દિલધડક રેસ્ક્યૂ ઓપરેશનને સફળ બનાવ્યું હતું અને અજગરને સુરક્ષિત રીતે પાંજરે પૂર્યો હતો.
