VALSAD NEWS: વાપી શહેરના ગીતાનગર વિસ્તારમાં મોડી રાત્રે કાયદો અને વ્યવસ્થાની સ્થિતિને પડકારતી એક અત્યંત ગંભીર અને સનસનીખેજ ઘટના સામે આવી છે. અંગત અદાવત અને જૂના ઝઘડાની અદાવત રાખીને ચાર શખ્સોના એક જૂથે એક યુવક પર ચપ્પુ વડે જીવલેણ હુમલો કર્યો હોવાની ચોંકાવનારી વિગતો પ્રકાશમાં આવી છે. આ ઘટનાને પગલે સમગ્ર વિસ્તારમાં ભારે ચકચાર મચી ગઈ છે અને સ્થાનિક લોકોમાં ભયનો માહોલ જોવા મળી રહ્યો છે.
મળતી સત્તાવાર વિગતો મુજબ, ભોગ બનનાર યુવક પિયુષ ઉર્ફે લકી રાજેશ ગોન્ડ મોડી રાત્રે તેના એક મિત્ર સાથે પોતાનું અંગત કામ પતાવીને શાંતિપૂર્વક ઘરે પરત ફરી રહ્યો હતો. પિયુષ જ્યારે ગીતાનગર જે ટાઈપ રોડ પરથી પસાર થઈ રહ્યો હતો, ત્યારે ત્યાં અગાઉથી જ ઘાત લગાવીને ઊભેલા ચાર યુવકોએ તેને રસ્તામાં રોક્યો હતો.આરોપીઓએ પિયુષને રસ્તામાં રોકીને જૂની અંગત અદાવતનો મુદ્દો ઉઠાવ્યો હતો અને તેની સાથે ઉગ્ર બોલાચાલી શરૂ કરી દીધી હતી. જોતજોતામાં આ વિવાદ એટલો વધી ગયો હતો કે મામલો બિચક્યો હતો. પિયુષે મામલો શાંત પાડવા અને સમાધાનના ભાગરૂપે આરોપીઓ સમક્ષ માફી પણ માંગી લીધી હતી.
ચારેય આરોપીઓએ ક્રૂરતાની સીમાઓ પાર કરીને પિયુષ પર ચપ્પુ જેવા તીક્ષ્ણ હથિયાર વડે જીવલેણ હુમલો કરી દીધો હતો. આ હુમલામાં પિયુષને ગંભીર ઈજાઓ પહોંચી હોવાના અહેવાલ છે. મોડી રાત્રે બનેલી આ ઘટનાને કારણે આસપાસના વિસ્તારમાં દોડધામ મચી ગઈ હતી.ઘટનાની જાણ થતાં જ સ્થાનીક પોલીસ કાફલો તાત્કાલિક ઘટનાસ્થળે દોડી ગયો હતો. પોલીસે ભોગ બનનાર યુવકને તાત્કાલિક સારવાર માટે નજીકની હોસ્પિટલમાં ખસેડવાની તજવીજ હાથ ધરી હતી. આ સાથે જ પોલીસે ગુનો નોંધીને ચારેય ફરાર આરોપીઓ (ભીમ ગુપ્તા, વિશાલ પ્રજાપતિ, સુરજ પાસવાન અને મહેરાજ મોહમ્મદ નઝીર ખાન)ને ઝડપી પાડવા માટે અલગ-અલગ ટીમો બનાવીને કાયદેસરની તપાસ ચાલુ કરી દીધી છે.
