ગાંધીનગરમાં અમિત શાહના અધ્યક્ષ સ્થાને ‘દિશા’ સમિતિની બેઠક: ખેડૂતો, દીકરીઓ અને વરિષ્ઠ નાગરિકો માટે લીધા મહત્વના નિર્ણયો

Gandhinagar News : છેવાડાના માનવી સુધી સુવિધાઓ પહોંચાડીને ‘ગામડાંનો સાચો વિકાસ’ કોને કહેવાય તેની એક નવી અને મજબૂત દિશા ગાંધીનગરની ‘દિશા’ બેઠકમાં જોવા મળી છે. કેન્દ્રીય ગૃહમંત્રી અમિત શાહે માત્ર સરકારી કાગળો પર નહિ, પણ જમીની હકીકત બદલવા માટે વહીવટી તંત્રને સ્પષ્ટ આદેશો આપ્યા છે. હવે માત્ર મોટા ગામો જ નહીં, પરંતુ 35થી વધુ ઘર ધરાવતા પરા અને મજરાઓ પણ ‘ગામ’ની નવી વ્યાખ્યા હેઠળ વીજળી અને રસ્તાની સુવિધા મેળવશે. કોઈ ઘર ગેસ જોડાણ, શૌચાલય, પીવાના પાણી કે સિંચાઈથી વંચિત ન રહી જાય તે માટે યુદ્ધના ધોરણે તાત્કાલિક સર્વે શરૂ કરવાના આદેશ અપાયા છે, તો બીજી તરફ વડીલોની ચિંતા કરતા 70 વર્ષથી વધુ વયના તમામ વરિષ્ઠ નાગરિકોને વિના વિલંબે આયુષ્માન ભારત (PMJAY) કાર્ડ આપવાની કડક સૂચના આપીને સરકારે આરોગ્ય સુરક્ષાનું મોટું કવચ પૂરું પાડવાની કટિબદ્ધતા દોહરાવી છે.

ગાંધીનગર ખાતે કેન્દ્રીય ગૃહ તેમજ સહકાર મંત્રી અમિત શાહના અધ્યક્ષ સ્થાને અને નાયબ મુખ્યમંત્રી હર્ષ સંઘવીની ઉપસ્થિતિમાં ડિસ્ટ્રિક્ટ ડેવલોપમેન્ટ કોર્ડીનેશન એન્ડ મોનિટરિંગ કમિટી (દિશા) ની એક મહત્વપૂર્ણ બેઠકનું આયોજન કરવામાં આવ્યું હતું. આ ઉચ્ચ સ્તરીય બેઠકનો મુખ્ય ઉદ્દેશ્ય ગાંધીનગર લોકસભા ક્ષેત્રમાં ચાલી રહેલા વિકાસ કાર્યોની ગતિને વેગ આપવાનો અને કેન્દ્ર સરકાર પુરસ્કૃત વિવિધ ફ્લેગશિપ યોજનાઓના અમલીકરણની સર્વગ્રાહી સમીક્ષા કરવાનો હતો. આ બેઠકમાં સંસદ સભ્યો, સ્થાનિક ધારાસભ્યો, જિલ્લા કલેક્ટર, જિલ્લા વિકાસ અધિકારી સહિત વિવિધ સરકારી વિભાગોના ઉચ્ચ અધિકારીઓ અને પદાધિકારીઓ મોટી સંખ્યામાં ઉપસ્થિત રહ્યા હતા. બેઠકની શરૂઆતમાં જિલ્લા કલેક્ટર રવિન્દ્ર ખતાલેએ તમામ મહાનુભાવોનું શાબ્દિક સ્વાગત કર્યું હતું અને વહીવટી તંત્ર દ્વારા સંસદીય ક્ષેત્રના સર્વાંગી વિકાસ માટે લેવાયેલા પગલાં અને ભવિષ્યના આયોજન અંગે વિગતવાર પ્રેઝન્ટેશન રજૂ કર્યું હતું.

ખેડૂતોની આર્થિક ઉન્નતિ માટે પશુધન વિતરણ અને કન્ટીજન્સી પ્લાન અંગે માર્ગદર્શન

બેઠકમાં ગ્રામીણ અર્થતંત્રને મજબૂત કરવા અને ખેડૂતોની આવકમાં વધારો કરવા પર વિશેષ ભાર મૂકવામાં આવ્યો હતો. અમિત શાહે તમામ વિભાગોની કામગીરીની ઝીણવટભરી સમીક્ષા કર્યા બાદ જણાવ્યું હતું કે, જિલ્લાના ખાતેદાર ખેડૂતોને આર્થિક રીતે વધુ સધ્ધર બનાવવા જરૂરી છે. એક પણ ખેડૂત પશુધન વગરનો ન રહે તે માટે વહીવટી તંત્રને ત્વરિત સર્વે હાથ ધરવા સૂચના આપવામાં આવી છે, જેથી દરેક ખેડૂત ખાતેદારને ઓછામાં ઓછા 2 પશુધન પૂરા પાડી શકાય. આ ઉપરાંત, વર્તમાન સમયમાં વરસાદ ખેંચાવાના કારણે ઊભી થયેલી પરિસ્થિતિને પહોંચી વળવા માટે તાત્કાલિક અસરથી કન્ટીજન્સી પ્લાન તૈયાર કરવા જણાવાયું છે. ખાસ કરીને બિન પિયત વિસ્તારોનો ચોક્કસ સર્વે હાથ ધરીને તેની તમામ વિગતો વહેલી તકે તૈયાર કરવા સંબંધિત અધિકારીઓને આદેશ આપવામાં આવ્યા છે.

કન્યા કેળવણીને પ્રોત્સાહન અને વાંચન સંસ્કૃતિના વિકાસ માટે આયોજન

શિક્ષણ ક્ષેત્રે દીકરીઓના ડ્રોપ આઉટ રેશિયોને નિયંત્રિત કરવા માટે બેઠકમાં એક નવતર અભિગમ અપનાવવાની ચર્ચા કરવામાં આવી હતી. સેકન્ડરી વિભાગમાં દીકરીઓ અધવચ્ચેથી અભ્યાસ ન છોડે તે સુનિશ્ચિત કરવા માટે 3 થી 4 ગામ દીઠ એક કલસ્ટર બનાવીને નવી શાળાનું નિર્માણ કરવા સંબંધિત અધિકારીઓને આદેશ કરાયા છે. આ વ્યવસ્થાથી ગ્રામીણ વિસ્તારની દીકરીઓને નજીકના અંતરે જ માધ્યમિક શિક્ષણ ઉપલબ્ધ થઈ શકશે. આ સાથે જિલ્લાના વિદ્યાર્થીઓમાં વાંચન પ્રત્યે રુચિ વધે અને જ્ઞાનનો વ્યાપ વિસ્તરે તે માટે નવનિર્મિત લાયબ્રેરીઓ વિશે વ્યાપક જાગૃતિ લાવવા જણાવાયું છે. આ તમામ નવીન લાયબ્રેરીઓને જિલ્લાકક્ષાની મુખ્ય લાયબ્રેરી સાથે કનેક્ટ કરવા માટે પણ માર્ગદર્શન આપવામાં આવ્યું છે.

પાયાની સુવિધાઓનો સર્વે અને ગ્રામ સડક યોજનાના નિયમોનું સ્પષ્ટીકરણ

ગાંધીનગર જિલ્લાના તમામ નાગરિકો સુધી પાયાની સુવિધાઓ પહોંચાડવા માટે વહીવટી તંત્રને સક્રિય થવા જણાવાયું છે. જિલ્લામાં હજુ પણ ઘરેલુ ગેસ જોડાણ, શૌચાલય, પીવાના પાણી, સિંચાઈના પાણી તેમજ વીજળીની સુવિધા વગરના રહી ગયેલા ગામો કે વિસ્તારો શોધી કાઢવા માટે તાત્કાલિક સર્વે કરીને રિપોર્ટ તૈયાર કરવા કેન્દ્રીય મંત્રીએ જણાવ્યું છે. વધુમાં, મુખ્યમંત્રી ગ્રામ સડક યોજનાના સુચારુ અમલીકરણ માટે ‘ગામ’ શબ્દની વ્યાખ્યા વધુ સ્પષ્ટ કરવા પર ભાર મૂકવામાં આવ્યો હતો. જે અંતર્ગત ઓછામાં ઓછા 35 થી વધુ ઘર હોય અને વીજ જોડાણ ધરાવતા હોય તેવા પરા અથવા વસવાટ વાળા વિસ્તારોને આ યોજનાના ધોરણોમાં નિયત કરવા માટે સૂચન કરવામાં આવ્યું છે, જેથી છેવાડાના વિસ્તારો સુધી પાકા રસ્તાની સુવિધા પહોંચાડી શકાય.

વરિષ્ઠ નાગરિકો માટે આયુષ્માન કાર્ડની સુવિધા અને દિશા સમિતિની ભૂમિકા

આરોગ્ય ક્ષેત્રે સરકારી યોજનાઓનો લાભ વરિષ્ઠ નાગરિકો સુધી પહોંચાડવા માટે કડક વલણ અપનાવવામાં આવ્યું છે. જિલ્લાના 70 વર્ષથી ઉપરના તમામ વરિષ્ઠ નાગરિકોને આયુષ્માન ભારત યોજના હેઠળના PMJAY કાર્ડ કોઈપણ વિલંબ વગર સત્વરે મળી રહે તે માટે યુદ્ધના ધોરણે કામગીરી કરવા વહીવટી તંત્રને કડક આદેશ આપવામાં આવ્યા છે. કેન્દ્રીય ગ્રામીણ વિકાસ મંત્રાલય દ્વારા ગઠિત દિશા સમિતિઓ જિલ્લાઓમાં કેન્દ્ર સરકારની યોજનાઓના મોનીટરીંગ અને કાર્યક્ષમ અમલીકરણમાં મહત્વપૂર્ણ ભૂમિકા ભજવે છે. આ ઉચ્ચ સ્તરીય બેઠકમાં સંસદ સભ્ય હસમુખ પટેલ, હરિ પટેલ, ધારાસભ્યો રીટાબેન પટેલ, અલ્પેશ ઠાકોર, બલરાજસિંહ ચૌહાણ, જયંતી પટેલ, મહાનગરપાલિકાના મેયર મીરાબેન પટેલ, જિલ્લા પંચાયત પ્રમુખ રાજેશ પટેલ અને જિલ્લા વિકાસ અધિકારી હસરત જાસ્મીન સહિતના અધિકારીઓએ હાજર રહીને વિકાસ કાર્યોની આ યોજનાઓને સફળ બનાવવા કટિબદ્ધતા દર્શાવી હતી.