TAPI NEWS: ગુજરાત સરકારના ભ્રષ્ટાચાર મુક્ત અભિયાનને વેગ આપતા, લાંચ રૂશ્વત વિરોધી બ્યુરો એ તાપી જિલ્લાના ડોલવણ તાલુકામાં એક મોટી અને સફળ કાર્યવાહી પાર પાડી છે. જમીન મહેસુલના કામ અર્થે નાગરિક પાસે ગેરકાયદેસર નાણાંની માંગણી કરનાર સરકારી અધિકારીને એસીબીની ટીમે પૂર્વ આયોજિત છટકું ગોઠવીને લાંચની મસમોટી રકમ સાથે ઝડપી પાડ્યા છે. આ કડક કાર્યવાહીથી ભ્રષ્ટ અધિકારીઓમાં ભારે ફફડાટ વ્યાપી ગયો છે. આ કેસની વિગત એવી છે કે, બ્લોક નં-38 વાળી ખેતીની જમીન વેચાણ દસ્તાવેજથી ખરીદ કરવા માટે મૂળ વેચનાર પાસેથી કાયદેસરની લેખિત સંમતિ મેળવેલી હતી.
ત્યારબાદ, સદર ખેતીની જમીનને જરાયત (સામાન્ય ખેતી) માંથી બાગાયતી જમીનમાં તબદીલ કરવા અને તેની કાયદેસરની એન્ટ્રી સરકારી દફતરે પાડવા માટે ફરિયાદીએ મામલતદાર ડોલવણની કચેરી ખાતે જરૂરી તમામ દસ્તાવેજો અને આધારભૂત રેકોર્ડ સાથે ઓનલાઈન-ઓફલાઈન અરજી સબમિટ કરી હતી. આ અરજીના કામે કાયદેસરની કાર્યવાહી આગળ ધપાવવા અને જમીનને જરાયતમાંથી બાગાયતમાં તબદીલ કરી આપવાના અવેજ પેટે ઓફિસમાં ફરજ બજાવતા આરોપી પાર્થેશકુમાર નારાયણભાઇ કટારા, નાયબ મામલતદાર (મહેસુલ ચાર્જ) એ ફરિયાદી પાસે પચ્ચીસ હજાર પુરાની લાંચની માંગણી કરી હતી.
ફરિયાદી પોતે એક સજાગ અને જાગૃત નાગરિક હોઈ, તેઓ ભ્રષ્ટાચારના આ દૂષણને પ્રોત્સાહન આપવા માંગતા ન હતા. તેઓ પોતાના કાયદેસરના કામ માટે સરકારી નિયમો સિવાય એક પણ રૂપિયો લાંચ પેટે આપવા મક્કમ ન હતા. આથી, તેમણે તાત્કાલિક લાંચ રૂશ્વત વિરોધી બ્યુરોનો સંપર્ક સાધ્યો હતો અને આરોપી નાયબ મામલતદાર વિરૂદ્ધ કાયદેસરની ફરિયાદ દાખલ કરાવી હતી. વડોદરા અને સુરત એકમના ઉચ્ચ અધિકારીઓના માર્ગદર્શન હેઠળ તાત્કાલિક એક્શન પ્લાન તૈયાર કરવામાં આવ્યો હતો.
પૂર્વ આયોજિત વ્યૂહરચના મુજબ, ફરિયાદી લાંચની રકમ આપવા માટે તાલુકા સેવાસદનમાં આવેલી નાયબ મામલતદાર મહેસુલની ઓફીસમાં પહોંચ્યા હતા. ટ્રેપ દરમિયાન, આરોપી પાર્થેશકુમાર કટારાએ ફરિયાદી પાસેથી લાંચના રૂપિયા 25,000/- નો સ્વીકાર કર્યો હતો. આરોપીએ નાણાં હાથમાં લેતાની સાથે જ આસપાસમાં વોચમાં ગોઠવાયેલી એ.સી.બી.ની ટીમે તુરંત ત્રાટકીને આરોપીને સ્થળ પર જ રંગેહાથ પકડી પાડ્યા હતા.
એ.સી.બી.ની ટીમે આરોપી પાસેથી લાંચની પૂરેપૂરી રકમ 25,000 રિકવર કરી લીધા છે. આરોપી સરકારી કર્મચારીએ પોતાના હોદ્દાનો દુરુપયોગ કરી ભ્રષ્ટાચાર આચર્યો હોવાથી તેમની ધરપકડ કરી કાયદેસરનો ગુનો નોંધી આગળની તપાસ હાથ ધરવામાં આવી છે.
