US Navy Saved Indian Boat: ઓમાનના દરિયાકિનારા પાસે રાસ અલ હદ નજીક અરબી સમુદ્રમાં એક મોટી અને સંભવિત જીવલેણ દુર્ઘટના ટળી છે. દરિયાના મોજાં વચ્ચે અચાનક ડૂબી રહેલી એક પરંપરાગત હોડીમાંથી તમામ ૧૪ ભારતીય નાવિકોને આંતરરાષ્ટ્રીય એજન્સીઓના સંકલનથી અત્યંત નાટકીય અને સફળ રાહત-બચાવ ઓપરેશન દ્વારા સુરક્ષિત રીતે બચાવી લેવામાં આવ્યા છે. આ કટોકટીની સ્થિતિમાં અમેરિકન નૌકાદળ અને ભારતીય નૌકાદળે ભારે તત્પરતા દાખવીને તમામ નાવિકોનો જીવ બચાવી લીધો છે.
રાસ અલ હદથી 80 નોટિકલ માઈલ દૂર સર્જાઈ કટોકટી
મળતી સત્તાવાર માહિતી અનુસાર, આ ઘટના ૧૪ જૂનની વહેલી સવારે ઓમાનના રાસ અલ હદ દરિયાકિનારાથી લગભગ 80 નોટિકલ માઈલ પૂર્વમાં ખુલ્લા સમુદ્રમાં બની હતી. ૧૪ ભારતીય નાવિકો સાથે પસાર થઈ રહેલી એક પરંપરાગત હોડીમાં અચાનક કોઈ તકનીકી ખામી અથવા પાણી ભરાઈ જવાને કારણે તે દરિયામાં ડૂબવા લાગી હતી. હોડી પર સવાર નાવિકોનો સંપર્ક તૂટી જતાં અને હોડી જોખમમાં હોવાના અહેવાલ મળતા જ આંતરરાષ્ટ્રીય સ્તરે હલચલ મચી ગઈ હતી.
અમેરિકન નૌકાદળના વિમાને દેવદૂત બની લાઈફ રાફ્ટ ફેંકી
પરિસ્થિતિ અત્યંત ગંભીર અને સમય ઓછો હોવાને કારણે, વિસ્તારમાં પેટ્રોલિંગ કરી રહેલું અમેરિકન નૌકાદળનું P-8 દરિયાઈ સર્વેલન્સ વિમાન તાત્કાલિક ઘટનાસ્થળે પહોંચી ગયું હતું. વિમાનના ક્રૂ મેમ્બર્સે જોયું કે હોડી ગમે તે ક્ષણે ડૂબી શકે તેમ છે, જેથી તેમણે વિમાનમાંથી જ દરિયામાં એક અત્યાધુનિક લાઈફ રાફ્ટ (બચાવ હોડી) નીચે ફેંકી હતી. અમેરિકન નૌકાદળની હવાઈ દેખરેખ હેઠળ, હોડી પર સવાર તમામ ૧૪ ભારતીય નાવિકો સમયસૂચકતા વાપરીને સુરક્ષિત રીતે એ લાઈફ રાફ્ટમાં સવાર થઈ ગયા હતા.
ભારતીય નૌકાદળ અને કોસ્ટ ગાર્ડ એલર્ટ મોડ પર
અમેરિકન નૌકાદળે આ સમગ્ર કટોકટીની પરિસ્થિતિ અને નાવિકોના લોકેશન અંગે ઓમાનના દરિયાકાંઠાના સત્તાવાળાઓ તેમજ ભારતીય નૌકાદળને તાત્કાલિક સેટેલાઇટ માધ્યમથી જાણ કરી હતી. માહિતી મળતા જ ભારતીય નૌકાદળ અને કોસ્ટ ગાર્ડની ટીમો પણ તુરંત એક્શન મોડમાં આવી ગઈ હતી અને તમામ એજન્સીઓએ સંયુક્ત રીતે ઓપરેશન પાર પાડી નાવિકોને દરિયામાંથી સલામત બહાર કાઢ્યા હતા. તમામ 14 ભારતીય નાવિકો સુરક્ષિત અને સ્વસ્થ હોવાના અહેવાલ છે. આંતરરાષ્ટ્રીય જળસીમામાં ભારત અને અમેરિકાની નૌકાદળ વચ્ચેનું ઉત્તમ તાલમેલ ફરી એકવાર માનવતાવાદી બચાવ કાર્યમાં આશીર્વાદરૂપ સાબિત થયું છે.
