Ahmedabad News : અમદાવાદમાં અષાઢી બીજના પવિત્ર દિવસે યોજાનારી ભગવાન જગન્નાથજીની 149મી ભવ્ય રથયાત્રાને હવે ગણતરીના દિવસો જ બાકી રહ્યા છે, ત્યારે સમગ્ર મંદિર પરિસરમાં ઉત્સાહ અને ભક્તિનો માહોલ ચરમસીમાએ પહોંચ્યો છે. આ વર્ષે નગરચર્યા દરમિયાન પ્રભુના અલૌકિક વાઘા અને વિશેષ શણગાર ભક્તો માટે મુખ્ય આકર્ષણનું કેન્દ્ર બનવાના છે, જેની તમામ તૈયારીઓ આખરે પરિપૂર્ણ કરી લેવામાં આવી છે. દર વર્ષની પરંપરા મુજબ અખાત્રીજના પવિત્ર દિવસથી જ મંદિરના મહંત શ્રી દિલીપદાસજીના વરદહસ્તે વિશેષ પૂજન-અર્ચન વિધિ કર્યા બાદ ભગવાનના વસ્ત્રો તૈયાર કરવાની મંગલ કામગીરીનો પ્રારંભ કરી દેવામાં આવ્યો હતો. મહિનાઓની સખત મહેનત અને કલાકારોની અદભુત સૂઝબૂઝના પરિણામે આ વર્ષે ભગવાન જગન્નાથજી, બલભદ્રજી અને બહેન સુભદ્રાજી માટે આંખો અંજાવી દે તેવા દિવ્ય અને અલૌકિક વસ્ત્રો તૈયાર થઈ ચૂક્યા છે, જેને નિહાળીને ભક્તો ભાવવિભોર થઈ જશે.
ઉનાળાની શીતળતા આપતા બેબી પિંક વાઘા અને રેશમી કાપડની પસંદગી
આ વર્ષે રથયાત્રા દરમિયાન ગરમીને ખાસ ધ્યાનમાં રાખવામાં આવી છે, જેથી ભગવાનને શીતળતા મળી રહે તેવા પોશાકની પસંદગી કરાઈ છે. પ્રભુ માટે ખાસ લાઈટ બેબી પિંક એટલે કે આછા ગુલાબી કલરના સુતરાઉ અને રેશમી વાઘા તૈયાર કરવામાં આવ્યા છે, જે રથયાત્રામાં ઉમટનારા લાખો નગરજનો અને ભક્તોને પરમ શાંતિ તથા શીતળતાનો દિવ્ય અહેસાસ કરાવશે. ભગવાનના આ વિશિષ્ટ વસ્ત્રો તૈયાર કરવા માટે દેશભરમાંથી ઉચ્ચ ગુણવત્તાયુક્ત કાપડના સેમ્પલ મંગાવવામાં આવ્યા હતા, જેમાં મુખ્યત્વે બનારસ સિલ્ક, કલકત્તી સિલ્ક અને શાહી મખમલ જેવા ખાસ કાપડનો ઉપયોગ કરવામાં આવ્યો છે. આ વર્ષના વાઘાની સૌથી મોટી વિશેષતા એ છે કે તેમાં પરંપરાગત આભલા વર્કની સાથે અત્યંત આકર્ષક રંગબેરંગી બોર્ડર મૂકવામાં આવી છે, જે ભગવાનના દર્શને આવતા ભક્તોના જીવનમાં સુખ, સમૃદ્ધિ અને ભક્તિના વિવિધ રંગો ભરાઈ જાય તેવા દિવ્ય અને મનોહર ભાવને સુંદર રીતે પ્રદર્શિત કરે છે.
સાત ચોગાવાળી વાંકી પાઘડી અને કલગીવાળો મોતીનો મુગટ
“વાંકી રે પાઘડીનું ફૂમતું રે મને ગમતું રે…” ની જગપ્રસિદ્ધ પંક્તિઓને સાર્થક કરતી ભગવાનની સાત ચોગાવાળી ખાસ વાંકી પાઘડી આ વર્ષની 149મી રથયાત્રાનું સૌથી મોટું અને આકર્ષક કેન્દ્ર બની રહેશે. વિવિધ આકર્ષક કલર, કિંમતી રત્નો, મણકા અને ઉત્કૃષ્ટ ડાયમંડ વર્ક ધરાવતી આ પાઘડી પ્રભુના મસ્તક પર શોભશે ત્યારે તેમનું સ્વરૂપ અત્યંત મનોહર લાગશે. આ ઉપરાંત, ભગવાનનો કલગીવાળો વિશિષ્ટ મોતીનો મુગટ પણ ભક્તોના આકર્ષણનું કેન્દ્ર બનશે. રથયાત્રાના ઉત્સવ દરમિયાન અલગ-અલગ દિવસોમાં ભગવાન વિવિધ સ્વરૂપે ભક્તોને દર્શન આપી ધન્ય કરશે, જેમાં અમાસના દિવસે પ્રભુ ખાસ વેલવેટના વાઘા ધારણ કરશે અને ત્યારબાદ પરંપરાગત સુવર્ણ વેશ ધારણ કરીને ભક્તોને ન્યાલ કરશે. આ સોના વેશની અંદર રાણી કલરના કિંમતી કાપડ પર વિશેષ દોરીવર્કનું બારીક અને નયનરમ્ય નક્ષીકામ કરવામાં આવ્યું છે જે કલાની દ્રષ્ટિએ બેનમૂન છે.
મંગળા આરતીનો શાહી શણગાર અને પુનઃ સિંહાસન આરોહણ
રથયાત્રાના મુખ્ય દિવસે વહેલી સવારે યોજાનારી વિશ્વપ્રસિદ્ધ મંગળા આરતીમાં ભગવાનનો શણગાર એકદમ અદભુત અને શાહી અંદાજનો હશે. સવારે આરતી સમયે ભગવાન સોનેરી બક્તર અને લાલ કલરના વેલવેટના શાહી વસ્ત્રો સાથે મસ્તક પર કલગીવાળો અતિ સુંદર મોતીનો મુગટ ધારણ કરીને ભક્તો સામે પ્રગટ થશે. આ વાઘા તૈયાર કરનાર જાણીતા કલાકાર સુનિલભાઈના જણાવ્યા અનુસાર, જ્યારે ભગવાન સવારે આરતી બાદ ભવ્ય રથમાં બિરાજમાન થઈને નગરચર્યાએ નીકળશે ત્યારે તેમનો સમગ્ર શણગાર ભક્તોને મંત્રમુગ્ધ કરી દેશે. રથયાત્રા પૂર્ણ થયા બાદ પણ ઉત્સવનો આનંદ ચાલુ રહેશે અને અષાઢી ત્રીજના દિવસે પ્રભુ ખાસ મલ્ટી કલરના એટલે કે બહુરંગી પ્યોર સિલ્કના વસ્ત્રો ધારણ કરશે. આ અત્યંત સુંદર રેશમી વસ્ત્રો સજીને ભગવાન જગન્નાથજી પોતાના રત્નજડિત મુખ્ય સિંહાસન પર પુનઃ બિરાજમાન થશે, જે સાથે જ આ ભવ્ય રથયાત્રા મહોત્સવના દર્શનની પૂર્ણાહુતિ થશે.
