Ahmedabad News: અમદાવાદના રાજપથ રંગોલી રોડ પર મોડી રાત્રે બનેલી ભયાનક અકસ્માતની ઘટનાએ ફરી એકવાર શહેરના રસ્તાઓ પર વધતી બેદરકારીનો પ્રશ્ન ઉભો કર્યો છે. સરખેજ પોલીસ સ્ટેશનમાં ફરજ બજાવતા બે હોમગાર્ડ જવાનને ડ્યુટી પોઈન્ટે જવા દરમ્યાન એક બેફામ કાર ચાલકે પાછળથી જોરદાર ટક્કર મારી હતી. ટક્કર એટલી ભયાનક હતી કે બંને જવાન ગંભીર રીતે ઘાયલ થયા અને એક હાલ બેભાન છે. ઘટનાને અંજામ આપનાર બ્રેઝા કારનો ચાલક સ્થળ પરથી તરત ફરાર થઈ ગયો હતો.
મળતી માહિતી મુજબ, મંજુરહુસેન (ઉંમર 27) અને તનવીર એમ. શેખ બંને સરખેજ પોલીસ સ્ટેશનમાં છેલ્લા કેટલાક વર્ષો થી હોમગાર્ડ તરીકે ફરજ બજાવી રહ્યા છે. તા. ૧૪ નવેમ્બર ૨૦૨૫ની રાત્રે ૧૧ વાગ્યે તેમને રાજપથ નાકાબંધી પોઈન્ટ પર ડ્યુટી સોંપવામાં આવી હતી. ફરિયાદી મંજુરહુસેન પોતાના પિતાની માલિકીની બજાજ ટુ-વ્હીલર પર તનવીરને પાછળ બેસાડી ફરજ સ્થળે જવા માટે નીકળ્યા હતા.
રાત્રે 12:15 વાગ્યે બેફામ બ્રેઝા કારની ટક્કર
આશરે રાત્રે 12:15 વાગ્યે બંને જવાનો રાજપથ રંગોલી રોડ પર ફ્રેસ્કો 42 કેફે પાસેથી પસાર થઈ રહ્યા હતા. ત્યારે જ પૂરપાટ ઝડપે દોડી આવતી મારુતિ સુઝુકી બ્રેઝા કારના ચાલકે બેદરકારી પૂર્વક વાહન હંકારી તેમની મોટરસાઈકલને પાછળથી જોરદાર ટક્કર મારી હતી. અચાનક થયેલી ધડાકાભેર ટક્કરથી બંને જવાન રોડ પર પટકાયા અને કેટલીક ફૂટ સુધી ઘસડાયા હતા. અકસ્માત સર્જીને કાર ચાલક અંધારાનો લાભ લઈ તરત જ નાસી ગયો હતો.
એક જવાન બેભાન, બંનેને ગંભીર ઇજાઓ
ઘટના બાદ રાજપથ ટી પોઈન્ટ પર હાજર પોલીસ સ્ટાફ, જેમાં હેડ કોન્સ્ટેબલ સિકંદર જશુભા અને અન્ય કર્મચારીઓનો સમાવેશ થાય છે, તેઓ તરત જ સ્થળ પર પહોંચ્યા હતા. ઘાયલ જવાનોને તાત્કાલિક 108 એમ્બ્યુલન્સથી સરસ્વતી હોસ્પિટલ, બોપલ પહોંચાડાયા હતા. મંજુરહુસેનને જમણા ખભાના ભાગે ફ્રેક્ચર, માથા, કપાળ, આંખ તથા બંને પગે ગંભીર ઇજાઓ થઈ છે. જ્યારે તનવીર એમ. શેખને માથા સહિત આખા શરીરે ભારે ઈજા પહોંચી છે અને હાલ તેઓ બેભાન સ્થિતિમાં સારવાર હેઠળ છે.
કારના નંબર પરથી પોલીસે તપાસ કરી શરૂ
પોલીસ કર્મચારીઓએ અકસ્માત કરનાર બ્રેઝા કારનો નંબર નોંધ્યો છે. મંજુરહુસેને કાર ચાલક વિરુદ્ધ કાયદેસર કાર્યવાહી કરવા માટે ફરિયાદ નોંધાવી છે. હાલ પોલીસ બેફામ અને બેદરકારીપૂર્વક વાહન હંકારી જાન જોખમમાં મૂકવાના ગુનામાં તપાસ શરૂ કરી છે. આ ઘટનાએ ફરી એકવાર શહેરમાં પૂરપાટ ઝડપે દોડી રહેલી કારો અને બેદરકાર ડ્રાઈવિંગને લઈને ચિંતા ઊભી કરી છે. પોલીસ હવે ફરાર ચાલકને ઝડપવા માટે સીસીટીવી ફૂટેજ અને અન્ય ટેક્નિકલ સહાય મેળવી રહી છે.
