મુંબઈ: દિવાળીના તહેવાર બાદ હાલમાં સોશિયલ મીડિયા પર એક વીડિયો ખૂબ વાઇરલ થઈ રહ્યો છે, જેમાં બોલિવૂડના મહાનાયક અમિતાભ બચ્ચને પોતાના સ્ટાફને દિવાળી બોનસ તરીકે ₹10 હજાર રોકડ અને મીઠાઈનું પેકેટ આપ્યું હોવાનો દાવો કરવામાં આવી રહ્યો છે. આ વીડિયોને પગલે સોશિયલ મીડિયા યુઝર્સ (નેટિઝન્સ) અમિતાભ બચ્ચનને જોરદાર ટ્રોલ કરી રહ્યા છે અને તેમની સરખામણી અન્ય કાલ્પનિક પાત્રો સાથે કરી રહ્યા છે.
વીડિયોમાં શું છે?
આ વીડિયો કોન્ટેન્ટ ક્રિએટર સાગર ઠાકુરે ઇન્સ્ટાગ્રામ પર પોસ્ટ કર્યો હતો. વીડિયોમાં તે અમિતાભ બચ્ચનના મુંબઈના જુહુ સ્થિત બંગલો ‘જલસા’ની બહાર ઊભો છે. તે ત્યાંથી પસાર થતાં સ્ટાફના એક સભ્યને મળે છે. વીડિયોમાં દેખાય છે કે મીઠાઈનું વિતરણ થઈ રહ્યું છે.
સાથે જ પૈસા પણ આપવામાં આવી રહ્યા છે, તેમ કન્ટેન્ટ ક્રિએટર જણાવે છે. તે પછી તે અમિતાભ બચ્ચનના કથિત સ્ટાફને પૂછે છે કે ‘કેટલા પૈસા આપ્યા છે?’ ત્યારે તે વ્યક્તિ કવર અને મીઠાઈનું બોક્સ બતાવતાં કહે છે કે, ‘₹10 હજાર રૂપિયા આપ્યા છે.’ કન્ટેન્ટ ક્રિએટર આ વ્યક્તિને અમિતાભ બચ્ચનનો સ્ટાફ ગણાવે છે.
નેટિઝન્સે શું કહ્યું?
આ વીડિયો વાઇરલ થતાં જ યુઝર્સે કોમેન્ટ્સનો વરસાદ વરસાવ્યો છે. અમિતાભ બચ્ચનની અઢળક સંપત્તિને ધ્યાનમાં રાખીને, ઘણા નેટિઝન્સ આ ₹10 હજારના બોનસને ઓછું ગણાવીને ‘બિગ બી’ને ટ્રોલ કરી રહ્યા છે.
કેટલાક યુઝર્સે કોમેડી સિરિયલ ‘તારક મહેતા કા ઉલ્ટા ચશ્મા’ના લોકપ્રિય પાત્ર ‘જેઠાલાલ’ સાથે અમિતાભની સરખામણી કરી છે. એક યુઝરે કટાક્ષ કર્યો કે, “જેઠાલાલ પણ આનાથી વધારે બોનસ આપે છે.”
અન્ય યુઝર્સે તેમને મળેલા બોનસ અથવા તેમણે પોતાના સ્ટાફને આપેલા બોનસ સાથે આ રકમની સરખામણી કરીને આશ્ચર્ય વ્યક્ત કર્યું છે.
જોકે, કેટલાક યુઝર્સ અમિતાભ બચ્ચનનો પક્ષ પણ લઈ રહ્યા છે, અને દલીલ કરી રહ્યા છે કે બોનસ આપવું એ એક સારો સંકેત છે અને રકમ વ્યક્તિગત બાબત છે.
વર્કફ્રન્ટ:
અમિતાભ બચ્ચન હાલમાં ‘કૌન બનેગા કરોડપતિ’ની 17મી સિઝન હોસ્ટ કરી રહ્યા છે. આગામી સમયમાં તેઓ કોર્ટરૂમ થ્રિલર ‘સેક્શન 84’, ‘કલ્કી 2898 AD’, ‘બ્રહ્માસ્ત્ર પાર્ટ 2- દેવ’ અને ‘રામાયણ પાર્ટ 1’ જેવી ફિલ્મોમાં જોવા મળશે.
