Ahmedabad News: ચંડોળા તળાવ બાદ અમદાવાદ મ્યુનિસિપલ કોર્પોરેશન દ્વારા શહેરના ઇસનપુર તળાવને દબાણમુક્ત કરવાની મેગા ડ્રાઇવ આજે, 24 નવેમ્બર, 2025ના રોજ વહેલી સવારથી શરૂ કરવામાં આવી છે. રાજ્ય સરકારની તળાવોના વિકાસની ઝુંબેશના ભાગરૂપે AMCના એસ્ટેટ/નગર વિકાસ વિભાગે છેલ્લા 40થી 50 વર્ષોથી તળાવની આસપાસ થયેલા 918 જેટલાં ગેરકાયદેસર પાકાં મકાનોને દૂર કરવાની કાર્યવાહી હાથ ધરી છે.
મોટા પાયે ડિમોલેશન અને પોલીસ બંદોબસ્ત
આ મેગા ડિમોલેશન ડ્રાઇવ માટે AMC દ્વારા 15થી વધુ JCB અને હિટાચી મશીનોનો કાફલો તૈનાત કરવામાં આવ્યો છે. કોઈપણ અનિચ્છનીય ઘટનાને ટાળવા માટે એસીપી, પીઆઇ, પીએસઆઇ સહિત 500થી વધુ પોલીસ જવાનોનો ચુસ્ત બંદોબસ્ત ગોઠવવામાં આવ્યો છે. આસિસ્ટન્ટ મ્યુનિસિપલ કમિશનરોની દેખરેખ હેઠળ આ દબાણ હટાવવાની કામગીરી વહેલી સવારથી ચાલી રહી છે.
બેઘર બનેલા લોકોની કફોડી હાલત
તંત્રનું બુલડોઝર આવે તે પહેલાં જ અનેક પરિવારોએ સ્વૈચ્છિક રીતે પોતાના ઘરવખરીનો સામાન ખાલી કરવાની શરૂઆત કરી દીધી હતી, જેથી કામગીરી શાંતિપૂર્ણ રીતે પૂર્ણ થઈ શકે. જોકે, આ દબાણોમાં પાંચ દાયકાથી રહેતા અનેક પરિવારો એકસાથે બેઘર બનતાં તેમની હાલત કફોડી બની છે.
સૌથી દુઃખદ બાબત એ છે કે, આટલી મોટી સંખ્યામાં વિસ્થાપિત થયેલા લોકો પાસે તાત્કાલિક પોતાનો સામાન મૂકવા માટે અન્ય કોઈ જગ્યા ન હોવાથી, તેમને ભારે હૈયે પોતાનો ઘરવખરીનો સામાન નજીકના સ્મશાનમાં મૂકવા મજબૂર થવું પડ્યું છે. આ કાર્યવાહી તળાવને તેના મૂળ સ્વરૂપમાં લાવીને તેને સુંદર અને વિકસિત બનાવવાના હેતુથી કરાઈ રહી છે, પરંતુ તેના કારણે વિસ્થાપિત થયેલા પરિવારોની તત્કાલીન રહેઠાણ અને સામાનની વ્યવસ્થા એક મોટો પ્રશ્ન બની ગઈ છે.
