Ahmedabad News: અમદાવાદના પાલડી વિસ્તારમાં આવેલી ચંદ્રનગર સોસાયટીના રહીશો માટે સોમવારની સવાર દહેશતભરી બની રહી હતી, જ્યારે સોસાયટીના કોમન પ્લોટમાં ભારતના ચાર સૌથી ઝેરી સાપો પૈકીના એક એવા રસેલ વાઇપર (Russell’s Viper) સાપને જોઈને અફરાતફરી મચી ગઈ હતી. સ્થાનિકોએ તાત્કાલિક એનિમલ લાઈફ કેરના વાઈલ્ડ લાઈફ એક્સપર્ટ વિજય ડાભીને જાણ કરી હતી.
ઝડપથી ઘટનાસ્થળે પહોંચીને વિજય ડાભીએ ૩ ફૂટ લાંબા આ ખતરનાક સાપને પકડવાનું દિલ ધડક રેસ્ક્યૂ ઓપરેશન હાથ ધર્યું હતું.
રસેલ વાઇપરના ઝેર અને હુમલાની ક્ષમતા
ખડચિતળો સાપની ગણતરી ભારતના સૌથી ઝેરી સાપોમાં થાય છે. વિજય ડાભીના જણાવ્યા મુજબ, આ સાપ તેના શરીરમાં હીમોટોક્સિન નામનું અત્યંત ખતરનાક ઝેર ધરાવે છે. આ ઝેર ડંખ માર્યા પછી લોહીને ગંઠાવી દેવાની ક્ષમતા રાખે છે અને સમયસર સારવાર ન મળે તો મૃત્યુ પણ થઈ શકે છે.
ખડચિતળાની શિકાર કરવાની પદ્ધતિ પણ તેને વધુ જોખમી બનાવે છે. તે સ્પ્રિંગની જેમ ઝડપથી ઝૂકીને બાઈટ કરવાની ક્ષમતા ધરાવે છે અને જોખમ પારખીને તે કૂકરની સીટી જેવો તીવ્ર અવાજ કરે છે, જે સામાન્ય માણસના હૃદયના ધબકારા વધારી દેવા માટે પૂરતો છે.
સોસાયટીમાં રાહત: સાપને સુરક્ષિત જંગલમાં છોડાયો
સોસાયટીના રહેવાસીઓમાં ગભરાટ ફેલાયો હોવા છતાં, વિજય ડાભીએ ભારે કુશળતા સાથે કોઈપણ પ્રકારની જાનહાનિ થવા દીધા વિના આ ઝેરી રસેલ વાઇપરનું સફળતાપૂર્વક રેસ્ક્યુ ઓપરેશન પાર પાડ્યું હતું.
સહી સલામત પકડાયેલા આ સાપને ત્યારબાદ સુરક્ષિત રીતે અમદાવાદથી દૂર આવેલા જંગલ વિસ્તારમાં મુક્ત કરી દેવામાં આવ્યો હતો. આ સફળ રેસ્ક્યુ બાદ ચંદ્રનગર સોસાયટીના રહેવાસીઓએ રાહતનો શ્વાસ લીધો હતો અને વાઈલ્ડ લાઈફ એક્સપર્ટનો આભાર માન્યો હતો.
