Ahmedabad News: અમદાવાદમાંથી રૂપિયા 1 કરોડ 68 લાખની જંગી ઉઘરાણીના વિવાદમાં એક વેપારી ભેદી સંજોગોમાં ગુમ થયા હોવાના સનસનીખેજ સમાચાર સામે આવ્યા છે. ગુમ થનારા વેપારીનું નામ ઓમપ્રકાશ મોહનલાલ શર્મા છે, જેઓ ગત ૨૯ ઓગસ્ટની રાતથી લાપતા છે. તેમના પરિવારજનોના કહેવા મુજબ, તેઓ ઓફિસમાંથી સામાન્ય શેડ્યુલ મુજબ જ નીકળ્યા હતા પરંતુ ઘરે પહોંચ્યા નહોતા. આ ઘટનાને બે મહિના જેટલો સમય વીતી ગયો હોવા છતાં વેપારીની કોઈ ભાળ મળી નથી.
પાર્ટનરે પૂર્વ નિયોજિત રીતે છેતરપિંડી કરી
ઓમપ્રકાશ શર્માએ ગુમ થતા પહેલા પોતાના બિઝનેસ પાર્ટનર્સ પર ગંભીર છેતરપિંડીના આરોપ લગાવ્યા હતા. તેમણે વીડિયો દ્વારા જણાવ્યું હતું કે તેમણે જીતુ શર્મા સાથે ગોવા પાન મસાલાનો કામકાજ કર્યો હતો અને જીતુ શર્મા થકી સચિન જોશી સાથે તેમની વાતચીત થઈ હતી, અને તેમણે પૂરા ગુજરાતનો ગોવા પાન મસાલાનો કામકાજ સંભાળ્યો હતો. શર્માએ દાવો કર્યો હતો કે તેમના પાર્ટનર્ જીતુ શર્મા અને સચિન જોશીએ પૂર્વ નિયોજિત રીતે છેતરપિંડી કરી છે. તેમણે આક્ષેપ કર્યો હતો કે જીતુ શર્માએ પ્રી પ્લાનિંગ કરીને તેમને બરબાદ કર્યા છે અને આ લોકોએ તેમને માનસિક તેમજ આર્થિક રૂપથી ખૂબ થકવી દીધા છે. શર્માએ ઓફિસમાં એક લેખિત સ્યુસાઇડ નોટ પણ છોડી હતી, જેમાં તેમણે ગોવા પાન મસાલાના વ્યવસાયમાં થયેલા દગાનો દાવો કર્યો હતો.
માધુપુરા પોલીસે FIR નોંધી નહીં
ઓમપ્રકાશ શર્માની દીકરી સ્નેહા શર્માએ પોલીસની નિષ્ક્રિયતા સામે ગંભીર સવાલો ઉઠાવ્યા છે. તેમનું કહેવું છે કે બે મહિના વીતી ગયા હોવા છતાં માધુપુરા પોલીસે એફઆઇઆર નોંધી નથી અને માત્ર જાણવા જોગની જ વાત કરે છે. પોલીસ દ્વારા એવું કહેવામાં આવ્યું હતું કે આ બનાવમાં એફઆઇઆર થતી નથી અને માત્ર જાણવા જોગ જ થાય છે. સ્નેહાએ સ્પષ્ટ આક્ષેપ કર્યો હતો કે આ વિવાદમાં બહુ મોટા મોટા લોકો ઇન્વોલ્વ છે, જેના કારણે પોલીસ તેમના પર હાથ નાખવાથી ડરી રહી હોય તેવું લાગી રહ્યું છે.
લાપતા થતા પહેલા ઓમપ્રકાશ શર્માએ રિક્વેસ્ટ કરી હતી કે જે કોઈ આ વીડિયો જોઈ રહ્યું હોય તે તેમને ન્યાય અપાવે. તેમણે સ્પષ્ટતા કરી હતી કે જો તેઓ પોતાના બીવી બાળકોને છોડીને જઈ રહ્યા છે, તો તેનું સૌથી મોટું કારણ જીતુ શર્મા અને સચિન જોશી છે અને તેમના ગયા બાદ તેમના બીવી બાળકોની બધી જવાબદારી પણ જીતુ શર્મા અને સચિન જોશીની જ રહેશે. પરિવાર ન્યાય મેળવવા માટે પોલીસ કમિશનર કચેરી અને ક્રાઈમ બ્રાંચના દરવાજા ખખડાવી ચૂક્યો છે. જોકે, બે મહિના પછી પણ પરિવારને કોઈ આશા મળી નથી કે કંઈક થશે કે વેપારી મળી જશે. વેપારીની ગુમ થવાની આ ઘટનામાં છેતરપિંડીના આરોપોની સાથે પોલીસની નિષ્ક્રિયતા સામે અનેક સવાલો ઊભા થયા છે.
